陳僖儀愛．反其道

有哪位女生不想異性大獻殷勤？面對各樣冧招時不會感動？但歌手陳僖儀（Sita）卻是鐵石心腸！雖然她擁有女生的外殼，但內裏卻充滿男性基因，追求者要攻破她防線確實不易，除非以靜制動，正如她說「最好乜都唔使做」，這就是她的愛情方程式。

時至今日，大部分男生的愛情觀念都是主動出擊，出盡冧招希望抱得美人歸，但原來冧招唔係個個女人受，起碼今年的樂壇新人陳僖儀會覺得反感。25歲的Sita戀愛經驗大概只有4次，但男生主動追她的成功率不足3成，相反她愛反客為主、主動爭取，她說︰「我係要女追男先得，可能個男仔唔再去追我，我就會鍾意佢！」

冇錯！Sita的愛情觀與別不同，她更非常抗拒異性送驚喜，男友按兵不動就是最好的做法︰「我係有少少犯賤底！唔鍾意有驚喜，另一半可以乜都唔使做！試過有男友想畀Surprise我，話喺重要節日陪唔到我，其實準備晒點同我慶祝，仲突然出現，可能其他女仔會好冧，但我會覺得佢呃我！」也許你覺得Sita極難服侍，其實她只是堅持原則，遇到讓她動心的男生，就會全情投入︰「其實我係一個愛情狂，可以用愛浸死人，咩都以個男仔為先！但好多男仔都怕咁樣，可能就係之前同男友分手嘅原因。」

享受公主抱

雖然Sita的愛情觀比較棘手，但她堅信白馬王子將會降臨，更夢想擁有童話式婚禮，她笑說︰「我希望結婚時老公會公主式抱住我，好有安全感！我諗40歲前應該可以啩！依家等工作上咗正軌先，哈哈！」談到擇偶條件，她直言謝絕貪靚男︰「以前想男友高大威猛同靚仔，但呢啲都會變。我鍾意一見鍾情，所以講唔到實質嘅擇偶條件。但我唔鍾意好大隻嘅男仔，一定唔可以太貪靚，我驚約佢要等好耐先出到門口！」

大多女生都貪靚，但對外貌不太講究的Sita卻說︰「唔化妝我可以接受！好多由細識到大嘅朋友都成日見我唔化妝啦！」她亦不覺得自己漂亮，故年少時有同學讚她靚女時，曾令她充滿疑惑︰「6年班時有人讚我，我對住張相望咗好耐，都唔知邊度靚，仲諗係咪玩我呀？」

素顏變鬼樣？

老實說，Sita的素顏沒甚麼大不了，卻遭母親與「鬼」相比，Sita笑說︰「之前喺電視台綵排，我冇化妝只係戴眼鏡去，點知播咗出街，媽咪睇完竟然同我講話似鬼，因為我有少少貧血，冇化妝咪面色比較蒼白囉！哈哈，我諗我都幾啱拍鬼片！」

提到拍電影，Sita將在新片《等我愛你》中玩突破演醜女，化妝後醜得連鏡都不敢照，她笑說︰「我演一個齙牙女仔要箍牙，到依家我都唔敢睇啲相！」過往曾有不少女星如莫文蔚、趙薇演醜角而爆紅，Sita說︰「我都希望出嚟效果好！雖然拍嗰陣成日畀導演火火同其他演員整蠱，但大家相處得好開心！」

後記：自封「宅男」喪(目及)女

興趣不多的Sita平日最常上網玩電腦，她亦自稱「宅」到不行，不過她笑言自己不是宅女，而是宅男，因她最愛上Facebook(目及)女︰「我好鍾意(目及)女，反而望男仔就真係好少，成個宅男咁！所以試過有朋友懷疑我嘅性取向(o架)，哈！」