羅霖當黎燕珊透明

黎燕珊與羅霖不和白熱化！二人昨晚同為「仁美清叙」晚宴出力，前者竟請來與羅霖因經理人關係不歡而散的李彩華任嘉賓，實行夾擊羅霖，但羅霖亦不甘示弱，問到死敵黎燕珊是否打扮漂亮時，她竟表示「睇唔到」！

昨晚大埔亞視總台舉行《仁美清叙慈善晚宴2012》，除傳不和的會長黎燕珊及主席羅霖外，眾亞姐包括黎淑賢、姚嘉雯、韓燕及顏子菲等均有出席，場面熱鬧！而黎燕珊及羅霖繼續成焦點，但論行頭，似乎戴上3千萬鑽飾的黎燕珊，成功揮低只得500萬鑽飾的羅霖，黎燕珊還帶同李彩華及其前經理人趙雪英等亮相，似是合力夾擊羅霖。

唔介意輸行頭

繼早前合照「交晒戲」後，黎燕珊及羅霖昨晚再被要求合照，經公關三催四請才成功合照，全程毫無交流，影完即閃！黎燕珊事後受訪時大嘆疲累，透露近日收到師妹們的短訊力撐，問到與羅霖是否冰釋前嫌，她說：「綵排大家有見，但未有時間去傾，司儀朱慧珊話完咗約食飯傾，唔係和頭酒咁大件事！（羅霖係咪朋友？）我冇敵人，信仰話我知要愛唔喜歡同傷害自己嘅人，同佢係好朋友，大家有同樣經歷，每個人都有優點同缺點，可能佢依家心情波動啲。」對於有指一班亞姐狂呻隨仁美到黑龍江探訪，不滿期間要陪客食飯，黎燕珊直言事件沒有那樣嚴重。

對於輸行頭，羅霖未有介懷，問到黎燕珊打扮是否漂亮時，剛影完合照的她竟表示看不到對方，擺明當對方透明。對於李彩華任嘉賓，曾任對方經理人的羅霖說：「見到面會打招呼，人最緊要開心，唔好記仇，但同佢冇聯絡啦！（係咪你請佢？）唔係，係珊姐請！」李彩華亦揚言會與羅霖打招呼：「我有禮貌，今晚係撐珊姐，絕對支持佢！（夾擊羅霖？）係你哋諗嘅啫！」

李彩華表演後，主動就前老闆林小明官司一案開腔，承認當年林小明曾要求她做合約以外的事情，鑑於她當時拒絕，失去不少工作機會，趙雪英說：「2005年3月公司會計同我講，話我身家畀人轉名，問林小明，佢話之後會轉番畀我，但一直都冇。」此外，林小明昨晚接受電話訪問時表示一切已是舊聞：「有關誹謗我嘅言論，我會追究到底。」