李詩韻約仔斷正尷爆

已3字頭的無綫姐仔李詩韻,兩年多前宣布與鄧健泓分手後,感情生活多姿多采,身邊男伴如車輪轉!近日忙於宣傳新劇《大太監》的她,前日下午4時駕駛火紅色座駕,載着一名斯文靚仔到中環。為免新歡曝光,李詩韻全程小心地玩前後腳,抵埗後先讓男伴落車步入餐廳,其後她才施施然下車入內會合。

為免洩露行蹤,二人刻意登上樓上雅座,邊食邊傾。離開時,李詩韻先行落樓,當她發現記者鏡頭時先是愕然,繼而一臉尷尬,最後出動勝利手勢遮面!她更打電話似向新歡通水,取車後更不惜撇下新歡。李詩韻昨日否認該男子是新歡:「邊有咁多男友?佢只係一個識咗好耐嘅朋友咋!」

李詩韻約會新歡被撞破,尷尬得想搵窿捐!

男伴先行落車,李詩韻過了一會才尾隨。