城Lynn外遊返好事近

天王郭富城與名模熊黛林（Lynn）關係進一步浮面！城城日前生日，Lynn陪他到蜜月勝地馬爾代夫慶祝，昨日返港時更一反常態，首度高調一同現身機場，雖然仍是玩前後腳，但他們心有靈犀笑吟吟，足證城城以行動確認女方地位，看來好事不遠矣！

近年「富黛戀」逐漸浮面，一次比一次「揚」！早前城城生日，二人飛往馬爾代夫慶祝，期間還轉機新加坡煙韌，過了甜蜜8日後，昨日他們終於返港！約下午2時，城城春風滿面返港，戴帽及黑超的他主動打招呼，記者祝他生日快樂，心情大好的他笑說：「多謝！（收到Lynn咩生日禮物？）趕住做嘢。（今次係預支蜜月？）咁有創意？都幾好笑！」問他為何一個人返港？是否由馬爾代夫回港？他全皆避而不談。

「今次特別有創意」

問到Lynn送甚麼禮物及有沒有驚喜時，城城摸摸耳朵笑而不答。期間見記者因追訪而差點跌倒，他着大家小心。對於被粉絲踢爆行蹤，他即轉移話題：「返嚟我會宣傳工作多啲。（叉足電返嚟？有冇潛水？）你咁有創意，我點答你？你哋啲同事已經分布喺上面（機場），好似私家偵探！（叉足電？）咩都係你哋講，又話攻城、圍城、焚城，好彩我仲企喺度，今次係特別有創意嘅諗法，好得意！（被Lynn攻陷咗？）辛苦哂！」說畢即上車離開。

相隔15分鐘後，Lynn才推着行李車出閘，其行李篋與城城更是同一款，全程甜笑。問到為何不跟城城一同出閘？她扮聽不懂：「吓？（同城城慶祝生日？）我放假啫！（預支蜜月？）冇。（感情更進一步？）冇乜嘢，好開心！（送咩禮物畀佢？）你問佢啦！」談到是否要先生仔後結婚？她指不要講得太遠。問到是否攻城成功？她甜笑說：「唔係！（有冇睇當地嘅結婚服務？）冇！（話你攻城？）咁樣呀？我冇睇！」

講到驚喜嗌好熱

記者笑他們在酒店房玩？她說：「冇乜特別！（去到咁遠都見到Fans？）見到中國人都開心！（算公開一大半？）冇諗咁遠！」問到城城可有求婚？她只笑而不答。問到可有驚喜給城城？她竟說：「好熱呀好熱呀！」此時有記者的收音咪跌地，Lynn即緊張問跌了甚麼？繼而被取笑她的求婚鑽戒沒有跌，她即撒嬌說：「我坐咁耐飛機，好攰呀！（稱呼你做郭太？）千祈唔好！（城城話50歲前結婚？）真係要問番佢！（你嘅意願？）開心就夠！」Lynn事後在微博上載一張食物相，意有所指：「愈簡單的東西就愈能夠帶來滿足感。」而Lynn經理人Kim則說：「暫時冇聽過（結婚），Lynn亦冇攞長假。」城城經理人小美則以短訊回覆：「城城覺得開心嘅任何事，我都替他開心和支持嘅。」