陳祉妤追尋理想伴侶

休息了兩年的陳祉妤終重新出發投入工作，父親的逝世曾一度令她失去人生目標感到失落，同時又要處理離婚事宜承受不少壓力，不過仍希望找到一個能照顧她的理想伴侶。

我依家已經全面投入番工作，之前嗰兩年我喺工作方面幾乎停咗落嚟，有好多事要處理，主要係我爹哋嘅離開，同埋離婚嘅事。我由細到大都好尊敬我爹哋，好錫佢，希望佢會以我為榮，努力工作都想爹哋見到我有成績，想賺多啲錢令佢生活得更好，等佢可以享吓福。爹哋一走咗，我即刻好似冇咗個目標咁，All My Life Is For My Dad，我唔知再咁努力工作為咩，會覺得爹哋都唔喺度，既然都唔使為佢咁努力工作，有Job冇Job都唔緊要喇！爹哋嘅走令我好傷心，當時嘅我有少少Depress（失落），亦一下子失去咗方向。

另一方面，我又要處理離婚嘅事，情緒上都幾Frustrated（沮喪）。有啲人會覺得我離咗婚，冇老公養所以要返番出嚟做嘢，其實我嘅經濟從頭到尾都冇問題，我係一個有儲蓄習慣嘅人，向來都有積蓄。

盼開狗店

當然，有老公會有人「打底」，如果唔係自己就要做得更好，努力賺多啲錢為將來計劃，要諗得長遠啲。我好少依賴我嘅另一半，但作為一個女人，當然希望可以物色到一個愛錫自己，能夠喺各方面都Take Care到自己嘅另一半。除咗做Modelling嘅工作，我都想做生意，想開狗店或者花店，又或者幫啲Luxury Brand（名牌）做PR嘅工作，我都好有興趣。

（明日待續）

口述：陳祉妤、筆錄：名人組