祖兒師兄互電1秒咁多

樂壇天后容祖兒與劉浩龍自公開戀情後首度同場，劉浩龍全程視線不離女友，但祖兒卻刻意當他透明。不過，蜜運中的二人最終還是打破「零交流」，忍不住在台上互望，歷史性「過電」1秒！

自今年6月承認「龍兒戀」後，容祖兒與劉浩龍（師兄）一直未有公開碰面，即使二人合演的電影早前舉行連串宣傳活動，師兄亦一直「潛水」！及至昨日舉行的《叱咤樂壇流行榜頒獎典禮》記者會上，二人終在認拍拖4個月後首度同場，當祖兒在台上路過時，師兄全程望到實，但祖兒卻加快腳步，刻意無視愛郎！

當全體歌手大合照時，大會安排二人分開企，站在第一行中間的祖兒，捉實緋聞男女方大同及薛凱琪傾偈作「擋箭牌」，而站在第二行側邊的師兄雖不停與張繼聰密斟，但仍忍不住伸長頸偷望女友，非常癡情！不過，一直當男友透明的祖兒其後終於「失守」，隔空偷望愛郎，「龍兒」世紀性深情對望1秒，令台上電力四射！

強調冇避忌

事後，問到祖兒為何經過師兄身邊時玩「快閃」，她打趣說：「唔通傾場偈先咩？（依家即刻去傾！）黐線！我唔想你哋諗多咗！」她直言沒想過與師兄合照：「唔係拒絕，但係都撞唔到！（喺後台傾偈？）後台好似維園咁大，撞唔到！」她還再三強調不會刻意避忌：「會避忌就唔會嚟，大家都係歌手，會尊重工作。」

而消瘦不少的師兄則否認祖兒陪他減肥，提到祖兒讚他肥得好睇，他笑說：「我個樣同身體係屬於觀眾。（祖兒話你肥咗會傻笑？）可能係嘲笑！」問到會否與女友合照，他推搪說：「唔好玩我啦！唔到我話事！」最終二人還是刻意避碰頭，「世紀合照」正式告吹！

此外，記者會以「土炮起來」作主題，祖兒化身懷舊的紅色花花茶壺，被讚又高又靚，而眾歌手亦悉心打扮展示香港情懷，包括吳雨霏、糖兄妹、G.E.M.及Shine等，各具特色。