煇哥引港姐埋身

「香港樂壇教父」顧嘉煇（煇哥）三代同堂出席馬場活動，宣布個唱添食，更風騷晒中獎彩票，年屆79歲的他令三位港姐趨之若鶩，與其他賓客排隊跟樂壇大師合照，而冠軍張名雅、亞軍黃心穎更大呻：「我哋撲唔到煇哥飛呀！」

煇哥昨日和兒子Ken、外孫女Pamela、演唱會出品人丘亞葵、演唱會嘉賓張德蘭及其夫婿，應邀出席「東方表行沙田錦標賽」，自言第一次到馬場落注的他，小注怡情中了150元彩金攞晒頭彩，他亦順勢宣布由11月30日起的《顧嘉煇大師經典演唱會2012》，兩度添食，共開6場，煇哥說：「我都預咗（添食）啦！」自信可應付一連6場的演唱會，因他主力負責開場及坐在台下睇騷。

撲唔到飛

煇哥受訪時，不少來賓要求合照及寒暄，雖被打擾用膳及敍天倫，但隨和的他來者不拒，而坐在鄰座的三位出爐港姐張名雅、黃心穎及朱千雪均被煇哥的大師風範吸引，和其他嘉賓齊齊排隊等合照，十足小Fans。張名雅和黃心穎表示首次跟煇哥見面感興奮：「雖然煇哥啲經典歌流行時，我哋仲好細個，但爸爸、媽媽成日都有播，所以我哋都識煇哥嘅歌，不過乜歌名就噏唔出。」

問三位港姐可有買煇哥演唱會門票？她們大發嬌嗲地說：「我哋買唔到呀，我哋都好想睇。」張名雅又說：「如果撲到門票就一定去會睇。」

至於黃心穎則說：「我就好彩啲，爸爸、媽媽買唔到，但有Auntie買到。」