Kary畀老外「食」咗

「前餅女」吳雨霏（Kary）趁萬聖節將至，前晚相約好姊妹鄧麗欣（Stephy）及區文詩到中環提早癲番晚。「爆谷女」打扮的Kary，因身上的爆谷盒黐滿爆谷，引來不少老外埋身連環試食！

現年26歲的吳雨霏，年初才與網球王子洪立熙翻撻，但上月又表示與男友處於冷靜期。暫時回復單身的她，趁着萬聖節將至，前晚約埋幾位好姊妹鄧麗欣、區文詩（Angela）及曾文能女兒曾昭怡等提早慶祝。

Stephy最似嘩鬼

當晚Kary穿上用卡紙製成的爆谷衫，化身爆谷女，並在爆谷盒黐上可食用的爆谷，造型突出！她與戴橙色溝粉紅色假髮、化上特大眼妝的Stephy及日本藝伎Look的Angela，往中環出席一個萬聖節活動，場內見Kary已被不少人圍住搶食爆谷，其中一位化身美國隊長造型的老外，好奇地上前伸手攞爆谷食，她亦無任歡迎！Angela亦不輸蝕，使出鹹豬手胸擊一名男扮女裝的男友人。

其後她們轉場到夜店狂歡，並玩至凌晨2時許離開，換妝後戴眼罩的「爆谷女」Kary站在酒吧外與女友人吹水，引來不少途人眼望望，期間友人遞電話給她，講了幾句後準備與友人轉身離開之際，突然有一位老外伸手偷食她身上的爆谷，Kary發現即怒睥了對方一眼。

前晚參加萬聖節Party的還有化身迷人Pink Lady版瑪麗蓮夢露的原子鏸，自言造型較特別：「好多人着經典白色！（自覺同瑪麗一樣性感？）唔係，但唱過佢啲歌。」而以黑色天使造型示人的張暖雅，原本Deep V開到落肚臍，但她說：「怕人多誇張，所以自己縫番。（怕瘋狂粉絲無禮？）怕有風吹，（胸）會Fing咗出嚟！」

文、攝：追蹤組