周家蔚秘製龍女 洪天明驚變三毛
懷孕六個月的周家蔚昨日挺着大肚子，穿兩吋高踭鞋出席《BB爬行大賽》，她說：「鞋踭好粗o架！好穩陣。（BB有冇老公洪天明咁百厭？）BB郁到震盪呀！我每晚瞓覺前會搵燈射個肚，再篤兩下，唱兩首歌，BB就乖唔踢，出咗世咁聽話就好。我想出年年頭生仔，年尾生女，我有生女秘方，生完會公開，費事唔靈畀人笑。」
而天明出席活動時說：「家蔚預產期係明年2月5日，早前聽到有BB個頭被儀器吸到甩，依家想改1月28日開刀，嗰日出世仲可以做龍仔添，一易發又好意頭！」他又指當務之急是減肥：「近排食肥咗，又有阿爸肥嘅DNA，有朝老婆瞓醒，見我塊面好大，以為洪金寶（三毛）瞓佢隔籬添！」同場的冼國林師傅說：「早排搵黃秋生同曾志偉對打，志偉仲好打得，但佢拍梅花樁舞獅，跌咗落嚟三次，好彩吊住威吔，冇危險。我同鄭嘉穎都熟，佢曾經向我請教詠春拳，佢好學，但拍劇流水作業，早排佢仲受埋傷添！」
腹大便便的周家蔚穿高踭鞋出席活動。
「發福」的天明被老婆周家蔚誤當老竇洪金寶。