陳祉妤堅信前夫冇偷食

陳祉妤（前名陳沛嘉，Balia）與前夫彭文堅的婚姻觸礁，外界都認為是因男方有第三者，Balia卻深信前夫沒有不忠，離婚絕非因對方偷食，只因兩人的步伐愈走愈遠，終走向不同方向而要分開。但她仍相信愛情，希望有日能覓得所愛組織幸福家庭，Balia將一連五日細說其家庭、事業、愛情觀及生活點滴。

我係個一拍拖就想結婚嘅人，唔會純粹拍吓拖就算，而係追求長久生活，希望同對方有將來。離婚我唔會覺得係外界啲人講嘅「唔係咁好」，亦冇怨天尤人，人生要學好多嘢，喺兩個人相處嘅過程中發現到大家有唔同方向，於是分開。即使係咁，能夠彼此認識都係開心嘅，我哋依家仲係朋友，會視佢為家人。決定分開都係成熟嘅處理，大家冇話刻意開會傾，好似有咗共識咁，知道大家方向好唔同，對某啲事情嘅觀念同態度唔一致。佢多數喺內地，我就喺香港，兩種唔同嘅生活，時間耐咗好自然係分開。

好多人會覺得我哋離婚係因為佢有第三者，之前佢畀人影到同其他女人出入酒店，我明白呢啲係娛樂新聞，並冇同佢為呢件事鬧過交，由第一日識佢已經知佢鍾意應酬，我哋分開冇0.1%係同呢件事有關。我好信任佢，知道佢唔會背叛我，彼此都互相尊重。但事後我要幫佢Wrap Up（整理），叫佢咩都唔好理，亦唔會答啲咩，等件事淡咗就冇嘢。

講Feel唔講金

同前夫分開當然有唔開心，自己係比較Family Life嘅人，好嚮往亦都好享受家庭生活。我父母都係相睇結婚，但現今社會有好多壓力，我會明白，Timing都好重要。我喺傳統家庭長大，思想好傳統，作為女性，會覺得男主外女主內，女性係要生小朋友，照顧屋企。我仍然相信愛情，對婚姻生活仲有憧憬，依然希望將來會搵到個理想伴侶，結婚生仔，但都要睇對方，同埋上天嘅安排。如果大家都愛大家，除非係要小朋友，否則結婚唔一定係Top Priority（最優先）。愛情係兩個人嘅事，最緊要相處得舒服同開心，結婚係為咗交代，互相相愛先係最首要。

一直都有好多機會去結識好多有條件嘅對象，但覺得枕邊人一定要講感覺，並唔係物質。對方要關心同愛錫我仲有我屋企人，要家庭觀念重，彼此要溝通到。我想組織家庭，有小朋友，最好一仔一女，有咗家庭同小朋友，我可以放棄事業，全心全意相夫教子，唔會假手於人，其實我都幾小女人。

（明日待續）

選美出身轉戰天橋

陳祉妤（Balia）原名陳敬密，其後改名陳沛嘉，早前再改名陳祉妤。Balia曾於1993年獲得「澳門小姐」選美大賽季軍，原本從事酒店業的她其後來港發展模特兒事業，並於2008年入選香港十大名模之一，曾走訪世界各地行騷。她於2009年選擇退下來，與拍拖四年的前無綫藝員彭文堅秘密結婚，但兩人婚後短短一年感情便亮起紅燈。彭文堅被影到在街上跟女子親熱並出入酒店，Balia事後依然撐他，表示既然結婚就要信任丈夫，可惜這段婚姻最終因兩人方向不同而於去年畫上句號。

口述：陳祉妤

筆錄：張嘉敏