古巨基拜神香灰辣傷手

古巨基、莫文蔚及鄭伊健等前晚一同出席活動，右手貼上膠布的基仔解釋因拜神時不慎弄傷，又透露日前自爆患皮膚癌的謝霆鋒曾向他展示手術後的傷口，因而更體會到健康的重要！

右手背貼上膠布的古巨基，與莫文蔚、鄭伊健及林嘉欣等前晚出席活動，問到發生甚麼事？基仔說：「其實唔係好緊要，之前音樂會拜神時支香好粗，啲灰跌咗落嚟辣親，一撥走啲灰手背已經起泡，層皮冇咗，音樂會完咗先搵嘢搽，依家敷膠布。」

提到謝霆鋒日前於節目上自爆患皮膚癌，問到可有慰問對方？基仔說：「之前有次食飯佢提過，亦有畀我睇做完手術後嘅位置，好似佢同大家講一樣，依家冇乜事！」他又指當時聽到霆鋒患癌的消息都感愕然，霆鋒亦有向他講述整個過程，令他更感健康的重要。問到可有檢查頭部？他表示有定期做身體檢查：「早幾年都未的起心肝，呢兩年就定時定候去檢查，關注多咗，緊張自己！」

此外，鄭伊健早前宣布明年迎娶女友蒙嘉慧（YoYo），他卻不欲多談婚禮籌備的情況，提到有指YoYo要求加名到其公司，他即否認：「我哋財政獨立，最近好多呢啲傳聞，都唔覺有咩好寫。」

伊健又指不需回應兩人出現分歧的傳聞，問到有報道指二人應接受婚前輔導？他說：「荒謬、無聊，同好好笑！」至於有指YoYo代言美容針？自言了解女友工作的伊健否認其事：「冇代言，佢咁黑，踩一次單車美幾多次白都冇用。」並反對醫學美容。而獲邀到上海出席I.T時裝展的YoYo，除親自挑選戰衣外，亦不忘為伊健揀衫。

莫文蔚唔生B

同場的莫文蔚表示將推出新碟，並大爆搶先試聽新碟的老公聽到想喊！而下星期將到英國拍MV的她表示會抽空陪老公，並透露不打算生小朋友。