黎燕珊見羅霖黑面速閃

兩位前亞姐羅霖和黎燕珊近日傳不和，昨日首度在活動上碰面，當傳媒要求兩人合照，黎燕珊黑面兼掉頭走，後來才態度軟化折返，主動搭着羅霖膊頭和握手，並說：「家和萬事興！」

盛傳不和的仁美清叙主席羅霖與會長黎燕珊，昨日在觀塘apm舉行的《仁美愛心滿亞洲》慈善晚宴記者會上碰頭，但全程零交流，羅霖寧願與隔住蘇永康一個身位的林建名握手，也未有與林建名身旁的黎燕珊打招呼；即使其後分別到台上致詞，但她們未有任何眼神接觸。

顧問葉家寶則趁機充當和事老，表示獲悉兩人近日發生不快事，但有信心最終能衝破紛爭是非。活動後，傳媒要求她倆合照，但黎燕珊黑面轉身落台，及後才態度軟化折返，主動輕搭羅霖膊頭，並握住羅霖的手說：「家和萬事興！」羅霖也以笑回應。

事後羅霖坦言自事件發生後，雙方從未聯絡，雖然葉家寶曾來電約見面，惟黎燕珊以忙碌為理由推卻，問到與對方見面可有尷尬？羅霖說：「唔會，我問心無愧，對事唔對人！我想話仁美唔係一個人努力，係所有會員同心協力做，有啲人誤解咗，以為一個人可以做囉！近排因為壓力好大，瘦咗10磅。」

自責忘記囝囝生日

而黎燕珊透露近日忙於為籌款晚宴事宜奔波，並稱她個人已籌得100萬：「唔係覺得自己好威，只係作為會長嘅責任，有咩風風雨雨，大家一齊面對啦！為呢啲事唔值得。（羅霖話你唔得閒見面？）呢排好多嘢做，又要收支票，又要分枱，但係有需要坐低傾。（頭先影相黑面？）我聽唔到啫！」黎燕珊更指因忙得不可開交，連兒子日前14歲生日也忘記，令她大感內疚，說罷更忍不住流淚。