Jessica C.買樓急煞停

香港樓市愈升愈癲，政府前日終出兩大辣招遏抑樓市。混血名模Jessica C.（JC）一心諗住月內買800萬元中價樓置業安居，可惜因冇「三粒星」要即時嘔多15%印花稅，打亂JC的業主夢！

政府前日推出兩大辣招，其中非香港永久性居民及以公司名義買樓均要交相當於樓價15%買家印花稅，政府落重藥令未有「三粒星」的藝人置業大計受到影響。

來港3年的「警鐘胸」Jessica C.，已打算在港落地生根，雖然她一直表示先在家鄉美國置業，原來已儲夠首期打算在港買樓。據知現於銅鑼灣租樓的JC，近月已不停睇樓，物色600萬至800萬元中價單位，臨近埋門一刻，政府突然出招，令非「三粒星」人士在港置業百上加斤，JC即時煞停做業主大計，決定放棄已睇中的單位。

鍾浠文上車受阻

記者昨日致電JC，她承認原本打算在這兩周內扑錘，可惜如今暫成泡影：「哎吔！仲睇中個啱心水嘅單位，港府今次出招好辣呀！我只係來港3年，都冇三粒星，依家買樓話要額外畀15%稅喎！如果買800萬元嘅樓，即係要畀120萬元稅，都係算喇！可能等有三粒星先啦！都幾灰！」

有「翻版徐子淇」之稱的鍾浠文（Zelia）同樣有置業打算，惟只來港4年，業主夢亦告受阻：「本來諗住明年年初買300萬元嘅上車盤，媽咪仲話我租樓成1萬蚊，咁不如買樓好過。可惜依家政府出招，計劃一定要推遲啦！咪等個樓市跌定再作打算囉！」JC和Zelia失意，但Ana R.卻為辣招得意，她接受電話訪問時高呼剛拿三粒星，可免買家印花稅：「我啱啱攞三粒星半年，真係好開心，因為已當香港成為我嘅家，一路都想置業，之前個市太癲，根本追唔上，依家政府出招，希望可以遏抑樓價啦！搞到我心郁郁，等買500萬至600萬元嘅樓！」難怪Ana興奮到連續兩天在Instagram上載與男友Brad到峇里旅行的合照。

陸詩韻等冧市巿

而在香港土生土長的陸詩韻昨日在活動上表示很早打算明年中入市，如今政府出招，可望明年樓價降溫：「依家手上冇貨，希望下年個市可以冧一陣，配合我買樓大計。」