江若琳谷新碟變倒米

江若琳昨日推出新碟，但自嘲碟內寫真「冇睇頭」！剛拿電影獎項的她對於能否當影后或上紅館，一切聽天由命。至於謝安琪「空降」星煥做一姐，她力撐公司絕無偏心！

闊別樂壇近三年的江若琳（Elanne），去年底加盟星煥國際後積極籌備大碟，大半年後終於有新碟《天空之樹》面世！她昨日到電台宣傳時坦言勁緊張，並指首批限量版會附送寫真集，問到可有性感造型？她即「趕客」說：「哈哈，冇嘢睇o架！」並透露寫真集中一改以往濃妝形象：「今次個妝同衣着都好清淡，以前大家覺得我係麻煩公主，依家其實只係個草根女孩！」對於謝安琪日前過檔做「一姐」，問到有否分薄資源？她說：「當然冇，每個人都做好本分，唔會比較！」

攞獎等「天算」

最近，Elanne在上海奪得首個電影獎項，她表示將與男主角杜汶澤及導演食飯慶祝，問到現階段想拿影后還是開紅館騷？她說：「以前成日諗呢啲嘢，但人算不如天算，依家我咩都唔諗！」

另外，老闆林小明近日捲入官非，Elanne亦被翻舊帳，但她一於懶理：「咁多年嘅嘢都唔關自己事！（問候老闆？）我相信老闆識處理！」談及剛去世的武打明星惠天賜，剛與其妹惠英紅合作電影的Elanne表示有短訊慰問：「叫小紅姐節哀順變，佢都覆咗我話冇事，心情已平復！」