鄧萃雯撻着戲神

視后鄧萃雯前晚出席活動時暗示沐浴愛河中，她露出冧樣說「開心」，難掩喜悅的她最終不禁以「戲神」及「才神」形容男友！

鄧萃雯（雯女）、馬賽、官恩娜（Ella）、張敬軒及許廷鏗等前晚出席《屈臣氏健康美麗大賞2012》，雯女一臉甜絲絲現身，即被追問是否蜜運中？她不置可否說：「你哋話係咪係囉！（即係有追求者啦？）開心！（老外定香港人？）我只可以答你開心！」她全程四萬咁口，問到為何不學鄺美雲承認有「樓神」男友？她說：「『樓神』？咁我要識『戲神』同『才神』！」

剛約滿經理人的雯女透露，有不少大公司向她招手：「有幾個選擇緊。（考慮內地公司？）唔係諗錢！搵經理人好似搵老公咁，要了解同欣賞對方，唔可以當我搖錢樹，要用時間磨合同用感情，男朋友用嚟撒嬌，經理人用嚟詐型！」

Ella露背搶鏡

至於以露背長裙示人的Ella否認翻撻吳卓羲，強調雙方已沒聯絡，問到會否翻撻？她說：「工作為先！」記者笑她是「四大」歌手之一，故沒有機會出席宣傳活動，但她說：「我後日（即今日）都會出席劇集活動，之前都有搵我，只係我病咗！」另外，馬賽以健康食品代言人身份亮相，問到有否留意有市民打美容針致死？她說：「冇，我亦冇打過Botox！」