式芝證Sean老婆地位

趙世曾不滿女兒趙式芝（Gigi）與鐘錶太子女楊如芯（Sean）高調宣婚，豪擲五億招婿，惟此舉反而激起Gigi「雄心」，昨日在Facebook寫上「你可以叫她做我的妻子」向Sean示愛，確定自己在同性戀關係上是「老公」身份！

趙式芝和楊如芯這對同性戀人愛得轟烈，自從上月兩人高調宣婚後，Gigi父親趙世曾一直不承認這段婚姻，更揚言要擲五億元招婿亦拒認Sean，一直尊重父親的Gigi，只想低調淡化事件，惟日前趙世曾出席公開場合，又再出招指女兒「好直」，更拒認是Sean「外父」，揚言無此福分，令身為夾心人的Gigi終禁不住要反擊。

谷埋谷埋不吐不快

昨日Gigi在Facebook用英文寫上個人感受，內容大慨指Sean最近因新聞而不開心，而重點是Gigi寫上「you can call her my wife」，擺明無視父親反對，更首度公開二人在這段同性婚姻中，兩人所擔當的「老公」、「老婆」角色！原來外界一直以為比較男性化的Sean是「老公」，如今Gigi自我解開謎團，更挺身而出保護「太太」，力抗父親反對！

G：Gigi　S：Sean　記：記者

Gigi昨日接受本報記者電話訪問，她承認Facebook的言論是安慰Sean，今次寫上感性留言是不想事情沒完沒了，轟轟烈烈來個了斷。

G：自從公開件事後，父母同Sean之間有好多矛盾，因為佢哋唔（承）認阿Sean，唔鍾意阿Sean，令到件事沒完沒了，希望嚟個轟轟烈烈嘅了斷，唔想再糾纏。

記：今次目的係乜？

G：目的唔需要同你哋去交代，總之想正面面對件事，見到Sean好唔開心，想以行動支持佢。

記：你喺Facebook提及「My Wife」，係咪暗指Sean？

G：如今唔使開名都知係邊個，依家唔驚講呢件事。

記：夾喺父母同Sean之間會唔會好辛苦？

G：呢件事唔止發生喺我身上，好多父母都唔鍾意子女另一半，唔好理我哋性別先，呢啲係好普通，唔係我先會發生咁嘅事。呢件事佢哋（父母）覺得太高調，將個責任賴喺Sean度，搞到Sean好唔開心，受到傷害！

「冇直接方法解決」

記：有咩解決方法？

G：都冇直接方法去解決，希望時間同多啲溝通去解決。但依家兩方面都唔想溝通，我只可以盡我嘅責任，我同父母溝通完，又同Sean溝通。

記：做咗夾心人對你嚟講係咪好折磨？

G：我由細到大都喺紛爭中長大，我慣咗面對呢啲事情，但Sean喺溫馨和諧中長大，佢屋企人好支持，今次件事傷害到佢，令佢唔開心，依家我最擔心Sean嘅健康，因為情緒會影響健康。

備受愛護「多謝佢」

記者其後亦致電Sean了解，備受壓力的她多謝Gigi的關愛，但不想回應太多。

記：你係咪因為件事好唔開心？

S：我冇唔開心。

記：Gigi話要轟轟烈烈咁了斷件事？

S：咁我都轟轟烈烈多謝佢啦！其他唔回應喇！

而趙世曾昨日原本出席首映禮，未知是否受到家事影響心情而甩底，同時亦沒有接聽電話！