邰正宵望明年開騷慰港迷

縱橫樂壇多年的歌手邰正宵魅力有增無減，前晚獲殿堂歌手大獎，愈戰愈勇！他對香港念念不忘，更宣布明年將回歸香港樂壇，盼明年於港開騷！

在台灣走紅的香港歌手邰正宵，前晚專程返港出席《新城國語力頒獎禮》，與葉蒨文同獲「新城國語力殿堂歌手大獎」，印證二人對樂壇發展的強勁影響力！眼見樂壇「十年人事幾番新」，邰正宵不敢以前輩身份自居：「上次嚟香港參加頒獎禮都十幾年前，今次好特別、好有新鮮感，拎呢個獎係好大嘅鼓勵！（覺得新人如何？）好出色！希望可以多啲合作，同年輕人合作有火花！（前輩級？）自己唔覺得係前輩，每次出新碟時都係新人，仲有好多地方要學習！」

近年長居台灣的邰正宵，現已甚少返港宣傳，但他表示相當懷念香港：「我依家Keep住一、兩年出一隻碟，好希望多啲返嚟香港宣傳！每次返嚟見到啲歌迷都好感動！佢哋有投訴我成日喺內地、台灣忙宣傳。嚟緊氹佢哋同氹自己，我會唱多啲廣東歌，特別係啲勵志歌幫年輕人！」他預告新碟將於本月底推出，為配合新碟風格，特地赴土耳其拍攝4首歌MV。

望與葉蒨文合作

問到今次久別重逢，對何人印象最深刻？邰正宵笑說：「當然係同我一齊拎獎嘅葉蒨文啦！知佢遲啲喺香港搞演唱會，如果我有時間都會捧場！同佢一齊拎獎好開心、好感動，希望可以同佢合作，都恨咗好耐！」忙於為旗下北京女新人籌備新碟的他透露，已有計劃明年於香港開騷，做好心理準備要中港台三邊走。