陳潔玲新玩「髮」Punk走陳妍希

前日《2012香港小姐競選》候選佳麗穿上背心短裙到Carnaby Street拍攝外景，吸引不少外籍人士圍觀及拍照。其中將一頭短髮Gel起的陳潔玲，在一眾長髮佳麗中脫穎而出，她說：「唔係髮型師特別錫我，係我平時短髮冇變化，太細路女，我都好鍾意呢個頭，個人精神啲。（唔驚唔再似陳妍希？）我都想有自己特色。（泳裝有咩準備？）絕食同練縮肚！我哋女仔都有傾吓清潔工夫、點行Catwalk，其實食飯、搭車、拍攝分兩組只係遊戲規則，唔會分化我哋。」對於被指整容，她否認：「我由細到大都係咁樣，靚咗可能係學識化妝，爆料人隨便拎啲相就話我整容，我一直都係雙眼皮，參選時評判話我鼻大，依家我打咗鼻影，視覺上唔同咗，化妝可以補救，唔需要整，我暫時冇諗過要整容，但唔反對人整。」

至於早前洩「浴照」的鍾麗雖然有前科，但其自選泳裝款式卻偏向保守，她說：「我自選泳裝唔係三點式！（你影慣少衫相？）唔係！泳裝少布又多人睇住，我唔慣，而且我身材冇其他佳麗咁好，我下盤好肥！」而陳華鑫則否認揀三點式搶鏡，她說：「啱自己Style、Colourful。（攝Pad？）我未試真，啱身就唔使，唔係大就靚，要啱比例，我欣賞岑杏賢嘅身材。」

湯洛雯孖Bra

另外，日前拍攝時「飛釘」的湯洛雯拋出「Bra孖論」否認走光，她說：「冇可能！我做足防走光措施，乳貼、膠紙再加兩個胸圍。（點戴兩個Bra呀？）總之你估我唔到！我好保險o架！（身為隊長點同女隊員備戰？）會搵時間坐低傾點行Catwalk，我都有啲寒背。」至於tvb.com網上人氣榜暫時由黃心穎爆冷排榜首。