呂慧儀達標 馬賽豐收

陰功豬，港姐竟然被詬病美麗與智慧「病重」，這個金漆招牌難道不保？馬賽和呂慧儀同樣是港姐出身，她們上位不是靠選美為捷徑嗎？為何硬要撥亂反正？莫非Miss Hong Kong個個都是朱玲玲和李嘉欣，千人一面不可？既然選擇得這條路，馬賽和呂慧儀亦心知肚明。

港姐選舉向來是娛樂界的盛事，即使今屆的港姐現仍在遴選階段，也足以令她們被不停追訪！回想起2008年的港姐競選，一位嬌滴滴、外貌和氣質都酷似台灣女星桂綸鎂的女子前來參選，因其清純的外表令她成為當年的大熱門，這個人就是馬賽！

自認怕醜女的馬賽，因讀大學一年級時失落實習機會，因而踏上選美之路：「當時完全冇諗過參選港姐，後來因為暑假搵唔到實習，加上我契媽用咗一個下晝說服我，就咁去咗參選，之後仲幸運地入圍、當選，上天整個安排都令我意想不到！」

獨立自強

馬賽本是修讀電視及電影系，對於電視製作深感興趣，故她把選美視作一次難得的見識機會：「我參加港姐冇乜壓力，因為呢個實習機會喺課內做唔到！每次跟同學仔講，可以投身喺無綫最大型嘅綜藝節目，都覺得好自豪！」她很慶幸能參選港姐：「如果冇參選港姐，就唔會有今時今日堅強、獨立嘅馬賽！」曾經缺乏自信的她，對於自我價值亦逐漸提升：「以前我好唔鍾意馬賽呢個名，因為太似男仔，後來成為一個公眾人物之後，愈嚟愈對自己個名有一份歸屬感同自信心！」

負面批評

馬賽自言以前是「一舊飯」，不過選美的經驗使她急速成長，現時面對批評也不易受到打擊，不過回想初出茅廬的時候，也不禁黯然神傷：「當時明明同一班佳麗喺加勒比海玩得好開心、相處得好好，但出嚟嘅報道又講我同邊位佳麗不和，又話我戰鬥格、爭出位，當時好唔開心，所以好想同師妹講，唔需要太介懷別人嘅聲音！」由港姐小師妹搖身一變成為師姐級，對於港姐質素被指每況愈下，她力撐師妹：「靚唔靚各花入各眼，我曾經接觸過啲師妹，覺得佢哋有自信同成熟美，所以女仔嘅靚唔應該只係外表咁簡單！」

入行至今，馬賽相對於一般藝人幸運，這4年間工作不斷，去年更憑出色的演技奪得「飛躍進步女藝員」！回想當初，種種機會的來臨也緣於選美：「選美真係可以令觀眾快速認識自己，但承受嘅壓力亦更加多，不過總括嚟講係得多於失！」活在當下是馬賽的座右銘，雖然不少人為了冒起和上位都不惜一切，但她卻是按部就班，不會急於求功：「我拍劇只有3年時間，其實都係啱啱開始了解拍劇嘅運作，仲有好長嘅路要走，至於『最佳女配角』就過幾年再諗！」

後記：盼執導演筒

馬賽入行後因學業和事業兼顧不來，最終選擇退學，成就演藝事業，但這對她來說實是一個遺憾，不過好學的她揚言未來一定會重拾書本，她說：「我自己嘅目標係有朝一日成為導演，雖然我依家係一位演員，不過希望喺演員方面鍛煉好自己後再去讀書，然後再成為一位出色嘅創作者！」

有名你叫「長腳蟹」，呂慧儀（Konnie）Day 1開始順風順水，恍如打橫行一樣。不是說她霸道，而是她真的受到無限眷顧，拍劇、拍電影、做司儀，又那一次不是「咪咪」與美腿雙輝映？成為新一代港姐Job后？話說回頭，一切源於Konnie擇路而走，而且是捷徑。

Konnie說：「選港姐無疑係一條入行捷徑，通常做電視台要考訓練班，唔知要上幾耐堂，實習又幾個月，的確選美比正常途徑快入行好多。講真，出面人哋搵你都係以知名度行先，如果啲客唔識你，講真幾有實力都冇用，係好現實！」

自我增值

當年，Konnie做模特兒去到樽頸位，一方面很難挑戰傳統名模，另一方面又不甘平凡做小角色，既然捷徑現曙光，對於港姐，Konnie便躍躍欲試，她說：「做Model真係做到好慣性，冇挑戰性，又好似冇乜發圍，一直都想有衝擊。2006年，模特兒公司老闆就提議我去選港姐，你知啦！一選就要簽TVB，佢都係為我好，先放我走。後來發覺，做藝員真係好過做Model！」

有人登絕嶺而小泰山，有人走捷徑而見步行，她深知走過捷徑後，自己便要努力拾級而上，因為世界上是沒有免費午餐，她說：「如果走捷徑後唔增值，一路故步自封，繼續懶懶閒，就注定你失敗。大家都識講港姐係美貌與智慧並重，諗嘢一定要比其他人快，到依家都會不斷努力學習，唔識就問人，唔好怕醜！」

笑容重要

一年容易又港姐，雖然仍未決定最後入圍佳麗是誰，但Konnie一語道破致勝之道──在乎笑，她說：「笑真係好緊要，一笑遮三醜，令人覺得你有親和力，始終選得你出嚟就要代表香港參賽，如果一味黑面，幾靚都冇用。」

Konnie送上Sure Win錦囊，對於港姐評選標準也侃侃而談，她說：「質素當然有上有落，冇可能個個都身材豐滿兼樣貌標致，我都唔係特別靚啦！點解入圍？因為夠平均囉！我知道大會選得個女仔入圍，就有佢可取之處。」她續說：「仲有一樣嘢要留意，就係唔怕畀人寫，當年我同Suki（徐淑敏）都畀人寫係獨孤精，其實係冇呢件事發生，當時真係好唔開心呀！但呢啲新聞原來對你好處多過壞處，選完之後就會發現只係小事，會愈來愈懂得面對輿論壓力。」

後記：成日兜錯路

Konnie向來都是醒目女，未結婚前，她總是狗仔隊追訪對象，但她幾乎每次都可以撇甩記者。小記問她是否女車神？她笑說：「唔係呀！其實我係路癡，成日兜錯路，加上我有時一諗到去邊就去邊，唔係想特登走捷徑撇甩佢哋o架！」Konnie說話如此圓滑，誰說港姐美貌與智慧「病重」。