江若琳揸車靠個樣冇人理

歌手江若琳趕往義工頒獎禮活動時遇上三宗車禍，嚇得她自爆不懂泊車及Cut線，只懂直線行車，更曾施「美人計」希望司機讓路，可惜「食檸檬」。

昨日江若琳（Elanne）在黃色暴雨警告下，任義工頒獎禮嘉賓，她一臉驚慌地說：「頭先喺途中目擊三宗交通意外，我都驚一驚！」並澄清肇事車輛並非其座駕，但當司機急急煞車，作為乘客的她也被嚇壞。

Elanne自爆1年多前已考獲駕駛執照，但因離港多時，疏於練習，故駕駛技術相當「水皮」：「我唔識泊車、Cut線，只可以行直線，有次揸車出去Cut唔到線，專登伸個頭出車窗畀人知係我，希望其他司機讓路畀我，點知冇人理我。（係咪冇化妝啲人認唔到？）有化妝，不過我笠咗頂帽。」她表示若長時間留港又要駕車的話，一定會補鐘操練駕駛技術。

學煮飯揼骨做賢妻

活動上，Elanne為長者按摩及剪頭髮，她自誇按摩功夫了得：「我細個時按摩已經好叻，我拍完電影《高舉．愛》之後，幫阿媽『鍊』骨時，佢話我大力到可以『鍊』到骨都碎！」但她未試過幫男友按摩，如果將來遇到真命天子，她會收斂「男仔頭」性格，學做服侍周到的賢妻良母，為老公煮飯兼揼骨。