陳庭欣獅城大擦九道菜
港姐陳庭欣（Toby）早前到有「獅城」之稱的新加坡工作順道旅遊，並為當地開張的食店任剪綵嘉賓，雖然只逗留三天，但已夠她四處搵食，她笑說：「因為嗰邊實在有好嘢食，所以一落機就同經理人衝咗去大牌檔食嘢，兩個人叫咗九樣嘢食，誇張到令人側目！」Toby未有放過著名的肉骨茶，提起亦無限回味的她說：「嗰邊嘅肉骨茶好重胡椒味，好好食o架，食完後仲要飲番啲茶中和番。」問到玩樂的部分時，Toby語帶可惜說：「唔夠時間去環球影城玩呀！但就去咗當地好有代表性嘅地標『魚尾獅』留影，嗰個地方好靚，仲望到對面嘅摩天輪，有種好舒服嘅感覺！」
另外，Toby透露買了六個斑蘭蛋糕回港作手信：「因為全部都唔可以寄艙，所以拎住返嚟真係好重，但好嘢食都想帶返嚟香港同家人朋友一齊分享，所以冇所謂啦！」
美食當前，港姐陳庭欣也暫時將減肥大計拋諸腦後。
陳庭欣暢遊新加坡，卻因未能抽空到環球影城而感遺憾！