高海寧甜酸苦辣味力十足

高海寧（高Ling）在飲食節目中嘗盡珍饈美饌，現實中的高Ling何嘗不是歷盡甜酸苦辣？有因必有果，吃過苦才覺甜，被人指三道四是壞女孩又何妨？苦盡甘來嘛，今天不是我們喜歡看她食相的甜姐兒高Ling嗎？

甜上心頭

因為小時候吃過苦，高Ling長大後更珍惜甜的滋味，一句「我細個好窮！」說明了一個不能改變的事實，令她發憤向上改變將來，試試未嘗過的甜味：「我唔係賺到好多錢，但依家終於可以改善爹哋媽咪嘅生活，減輕佢哋負擔，見到兩老唔使做得咁辛苦，個心當堂甜晒！」

入行三年，有件事令高Ling更甜，就是認識了經理人Cindy，彼此關係情同母女，她說：「Cindy媽實在太重要，佢唔只係為我安排工作同接Job咁簡單，佢仲教我點做人，剖析一切利與弊，就好似我媽媽咁，呵護我同愛錫我。我有乜唔開心，佢一定第一時間安慰我，我就會攬住佢喊，除咗雙親外，原來呢個世界會有人緊張過我自己，佢會攬住我喊，雖然流淚，但我個心好甜！」

就是一個好伯樂，加上努力，現在高Ling可真正脫貧，原來上天對她也不薄：「我覺得自己係一個幸運嘅人，入行後冇乜風浪，未係大紅大紫，但起碼穩步上揚，人生於此，夫復何求！」

酸不可擋

想到過往的酸，高Ling就想到被屈的一幕，好地地一個女仔，因為身材出眾，眉角散出幾分妖艷，就被指是壞女仔，這種淒酸，她坦言不願再嘗：「曾經被人話係壞女仔，真係好介意，我只係身材好啲同個樣特別啲，點解冇證據都成日話我爛蒲先？我知、朋友知同屋企人知我係點就得，我發誓一次都未試過蒲老蘭，25年都未試過，除咗工作，連離家過夜都冇，唔知係咪因為外形關係先畀人誤會，所以依家更加要律己以嚴，唔可以行差踏錯，因為呢種酸，的確令人難受。」

苦不堪言

輿論是一張雙刃刀，一方面捧到你上天，另一方面可以打你落十八層地獄，高Ling自言曾在地獄徘徊，嘗盡不可磨滅的苦痛：「讀書時同同學仔日見夜見，最知我性格，邊有咁多是非，反而我係學校最受歡迎嗰個。但一入行，真係唔知點去面對輿論壓力，不斷被人誤解扭曲，Come On，我要面對700萬香港人嘅壓力，講真，我試過崩潰！」在這段日子，高Ling連做人也提不起勇氣，跌入一個無底深淵：「嗰陣時真係大壓力到喊，唔好話笑，連任何表情都唔識做，眼淚無啦啦標出嚟，又買好多朱古力同零食，又試過煲一大煲飯狂食，靠食嘢去麻醉自己，終日困自己喺房。後來爹哋媽咪發現我唔對路，就捉我出街接觸人群，呢種苦，非筆墨可以形容。」

辣出繽紛

辣的味道刺激過癮，尤其起初入行第一套演出的並非劇集，而是一部電影，做打女一名，對不諳功夫兼手腳不協調的高Ling來說，委實辛辣得很，她說：「我入行第一套拍嘅唔係劇集，而係電影《美麗密令》，戲中要我做一個騷在骨子裏嘅女人已經唔識，仲要做一個打女，真係考起我！記得嗰日阿Sa（蔡卓妍）同吳君如都放假，得我自己一個打足廿個鐘，起身跌低幾十次，仲要塊面趴喺地下食沙，最後係點？咪發高燒囉，好彩導演都讚我做得好！」

後記：選擇為食

高Ling拍慣飲食節目，人人都說她是為食妹，原來她並非甚麼都可放落五臟廟，做飲食主持其實有選擇權，她說：「點解飲食節目有幾個主持？因為唔係碟碟餸菜都啱胃口，所以公司唔會逼我哋食！」