諸葛紫岐座駕捱貨車撞

諸葛紫岐前日出外工作途中發生意外，其座駕被一輛貨車撞凹且嚴重刮花，要入廠修理，幸好她沒有受傷，有驚無險！

諸葛紫岐前晚出席活動，提到當日在微博透露外出工作途中遇上交通意外，她說：「我架車經過時，架貨車後面嘅車門突然打開，撞咗落我架車度，嗰下好大聲，嚇到坐我車嘅化妝師好驚。（你有冇嚇親？）冇，但驚咗一驚。我架車撞凹咗，花得都幾嚴重，要整幾日！我報咗警，原來嗰度係唔可以泊車同落貨。（有冇打畀老公報平安？）冇，OK啦！」

她透露原本當晚去看Lady GaGa演唱會，但因出席慈善活動而擱置，笑言希望老公薛嘉麟再撲飛。婚後未度蜜月的她或於6、7月出發，地點由老公安排，她說：「我諗佢會畀驚喜我！」至於今年母親節，她將分別陪母親和奶奶吃飯並送上禮物，問到兩份禮物是否同等分量，她說：「我對佢哋兩個都咁好，因為佢哋都咁錫我！」

Lisa S.努力造人

另外，同場的名模Lisa S.以性感Deep V裝行騷，她笑言不怕走光：「我個胸好細，唔會周圍走，跳舞都唔驚。（老公吳彥祖畀你性感？）佢唔介意，佢知我工作係Model，佢拍戲都試過裸體上陣啦，好公平！（有冇性感底線？）唔會着比堅尼，因為我腹部線條唔夠靚。」她還透露其美容生意稍後會與琦琦合作，而生BB計劃仍在努力中，更笑言懷孕時就能擁有一條深長的「事業線」。