黃子菲「絕育」兩年搏殺

妻模黃子菲最近加盟林小明公司旗下做江若琳師妹，獲老闆舉行二十歲生日派對慶祝，令她受寵若驚，直言兩年內不生仔報答公司厚愛！

新婚不久的黃子菲（Ava），出道時被冠上「嫩版張栢芝」稱號，最近她獲林小明公司看中並羅致旗下，成為江若琳小師妹，而早前牛一的她更獲老闆舉行生日派對，得寵度十足！派對上除了有Fans為她慶祝，同公司的陳柏宇女友符曉薇及廖鈺堅亦有出席。

老公通氣冇詐型

為報答老闆厚愛，Ava承諾兩年內不生仔，笑言幸好有老公體諒：「老公不嬲都好支持我做呢行，不過本來佢真係想我快啲生，但依家簽咗新公司，我想以事業為重先，好彩佢都冇詐型！（有咩條件？）只要形象唔好過分暴露就得！」至於生日願望，她說：「想多啲工作，唔想嫁咗人就唔做嘢，我年紀仲細想見識多啲。」

眼見江若琳在影壇發展理想，Ava相當羨慕，並期待有機會與師姐合作，她說：「我之前睇咗佢套《高舉愛》，覺得佢做得好好，同埋佢為部戲而增肥，非常專業！（有機會想試？）好想，咩角色都想試，唔好太性感就得，唔係一定畀老公詐型！」