祖兒勸慎言 阿Sa嚇一跳

美國百變天后Lady GaGa日前在Twitter聲稱在港買A貨手袋，前晚又在個唱上自爆被本港海關上門問話，本港天后容祖兒及蔡卓妍亦分別表態！

據有關消息稱，海關確實採取行動上門調查，但GaGa未有出示提及的手袋，所以海關也無法肯定她是否曾買A貨！至於手袋品牌方面，海關亦未收到其公司投訴。由於GaGa自稱在香港中環買A貨的事件，故海關商標調查組近日已派員到中環附近巡視，至今未有發現。

GaGa A貨論一出，引起全城熱話！祖兒昨日出席OSIM活動時，問到GaGa的言論會不會影響香港的購物天堂形象？祖兒笑說：「當然會有影響啦！佢係公眾人物，又係知名人士，佢講每一句話影響都會好大！（佢喺個騷話講笑？）佢都知道自己唔可以亂講嘢，如果佢咁多錢都要買假貨嘅話，係因為貪玩！」

改造Tee遭諷刺

而蔡卓妍（阿Sa）昨日接受電台訪問時，對GaGa的A貨論表示驚訝：「吓！咁搞笑嘅！香港真係乜都有，購物天堂嚟o架！不過佢使乜買老翻，佢有私人飛機喎！（佢澄清講笑？）係囉！佢咁有錢，可能係貪得意講笑啫！」她坦言曾穿過一件由設計師將某品牌Logo作為藍本二次設計推出的Tee，而被該公司諷刺：「嗰間公司寄信過嚟，話其實我去買嘢係有折扣嘅！」