GaGa區旗攝底褲

百變天后Lady GaGa演唱會愈玩愈激，繼自爆買A貨手袋被海關問話後，GaGa昨晚第二場演唱會連香港區旗都玩埋，除把區旗當舞龍咁舞，又把旗幟勾入底褲邊，有褻瀆香港區旗之嫌！

美國天后GaGa昨晚第二場在晚上8時半開騷，全場爆滿，Fans比頭場更High，更多次大玩人浪。她又再把特區區旗亂舞，唱得興奮時，更把電單車尾的區旗圍在腰間，可是因為綁不實，GaGa索性把區旗圍勾在底褲邊，並高呼：「我似唔似港女？」大有褻瀆區旗之嫌。前晚GaGa舉行開騷期間，亦穿上超激的性感內衣褲，坐在一輛插了香港區旗的電單車上，與舞蹈員互磨極盡意淫。黃國桐律師稱此舉大有問題，犯下「褻瀆區旗」：「區旗喺香港法律上唔單止唔可以撕毀，亦要尊敬。佢着成咁，然後將區旗綁喺腰度，仲要跳舞，加埋咁嘅動作好有問題，對區旗好不敬，犯咗『褻瀆區旗』。雖然大家文化唔同，但香港係中國人社會，要尊重番我哋嘅文化，區旗係要尊重。」

粉絲遭扑穿頭

昨晚跟頭場大同小異，GaGa獨角獸車出場，唱第一首歌《Government Hooker》時，男Dancer瘋狂模GaGa大髀，意識大膽，到唱《Born This Way》時，她又掀起長裙，送兩條大髀給Fans睇，十分風騷。

現場所見，昨晚多了許多內地Fans，有人聲稱以4,000元人民幣（約5,000元港元）買飛入場。大會還把某些買1,280元門票，但扮特別的Little Monsters，升級到最貴的1,580元企位，未開騷前，亦見疑似排隊黨公然收錢幫人排隊。此外，有觀眾在前排觀看GaGa騷期間，被人從後用硬物扑穿頭，要即時送醫院。

心情差拒合照

另外，前晚首場開騷令全城瘋狂，可是向來力臻完美的GaGa卻不滿意自己的演出，搞到不少到後台朝聖的藝人吃了閉門羹。據知，前晚後台保安森嚴，大多數等影合影的藝人也未能一睹她的風采，連陳奕迅（Eason）與老婆徐濠縈及康堤一家三口在後台停車場經過，亦跟GaGa緣慳一面。原來GaGa極不滿意前晚的表現，心情跌至低點，故完全自困休息室，並叫齊工作人員入房作檢討。對於未能見GaGa一面，Eason說：「佢個騷製作龐大，極盡視聽之娛，造型又多，好似睇拉斯維加斯騷咁，我覺得係一個藝術成分好高嘅騷！」問有否向囡囡作家長指引？他說：「佢冇問我個騷有三級嘢，只係問我件衫係咪真豬肉，我話冇血淋淋，應該係道具，佢問先作家長指引啦！」雖然不少藝人吃了悶棍，但林青霞老公邢李火原與前妻張天愛所生的女兒邢嘉倩卻集得GaGa難得郵票，難怪十分開心。

前晚遲開騷的GaGa最後Encore十分鐘，全長110分鐘，GaGa不但連特區旗玩埋，Encore前又興奮到雙手豎中指。Encore第一首歌《Edge Of Glory》全場合唱，男Dancer還抱起她轉圈，攬作一團幾乎咀嘴，最後一首歌《Marry The Night》更有人把螢光棒掟上台，不禁令GaGa感動地說：「冇諗有咁多人支持我！」