鍾嘉欣：同過千隻蚊住

「玉女」像是甚麼都完美無瑕，不過身為玉女的鍾嘉欣卻自爆在現實生活中是「一舊飯」，初來港時完全不懂照顧自己，最令人感到毛骨悚然的，就是她曾住垃圾屋，跟過千隻蚊子同住！

初來港時，真係以為自己咩都識，實識照顧自己。啱啱住公司宿舍時，媽咪嚟香港陪我，間屋當然好乾淨，但佢一走，我就搞到間屋烏煙瘴氣！用完嘅碗碟，唔洗就咁放喺鋅盆，啲垃圾又就咁擺喺度，見放咗一星期冇事喎，又繼續唔理！兩星期後，鋅盆全部都係未洗嘅碗碟，垃圾又愈積愈多，但我真係太忙又唔想理！

如是者成堆垃圾同碗碟擺足成個月，間屋真係好恐怖！除咗間房，洗手間、客廳同廚房都好污糟，仲養到成屋都係蚊，大大話話我諗都有過千隻！所以一返屋企就即刻衝入房，冇必要都唔敢再出房，驚啲蚊飛入嚟！嚴重到咁，又臭又核突，我更加驚到唔敢清理，最後要父母同朋友嚟幫我執屋，仲鬧到我傻！自此我真係唔敢再懶，一用完嘅碗碟即洗，垃圾即扔，唔想再同過千隻蚊一齊住！

冷氣機滴水冇計

哈哈！大家唔好以為我好污糟，只係我初時唔識得照顧自己，所以發生咁多趣事。有一年睡房個冷氣機滴水，瞓醒時先見到滴到水浸咁滯，床尾滴到濕晒，成隻腳都濕晒！但係業主又冇即時搞，我捱咗好耐，滴咗成個月！惟有用好多個盒黐喺牆兜住，諗住滿一個可以滴落另一個盒度，真係好好笑！

（明日待續）

口述：鍾嘉欣　筆錄：專案組