朱茵佗運財BB 800萬送上門

黃貫中（Paul）前晚宣布女友朱茵大肚兼準備結婚，短短一日內，兩人接到50個工作邀請，隨時吸金800萬元，令朱茵腹中塊肉變成「運財BB」！但Paul不想未來老婆太操勞，會勸朱茵停工待產，自己則密密做賺錢。

朱茵和Paul將結束14年愛情長跑，前日公告懷有龍B，兩人前晚由馬來西亞返港後，昨日整天足不出戶休息。據他們的經理人Ada透露，自兩人公布喜訊後，工作如雪片飛來：「我個電話同電郵都畀人打爆，已經收到商演、廣告、香港同內地電影、電視劇主辦商嘅邀請，保守估計酬勞一定過800萬。BB腳頭好好，工作滿到瀉呀！未試過咁勁。」她透露朱茵恨接尿片、奶粉廣告，價錢高又有贊助。

而Paul接受本報電話訪問，身為準爸爸的他開心到不得了，惟不肯透露求婚詳情，只稱是上個世紀求婚。談及前晚在機場被半百記者包圍，他說：「阿茵有少少嚇親，唔知咁多人，今日我會留喺屋企陪佢，大家唔使等天光。」對於前晚傳媒追訪時被保安車在隧道急停攔截，他表示不是他們的意思，經理人解釋是壞車而已。

想操刀影大肚裸照

由夏永康為兩人拍攝的赤裸相擁照片被激讚，問到Paul會否親自操刀幫老婆影大肚裸照？他說：「我都想呀！但要見肚先，佢啱啱三個月，冇嘢睇。」記者笑指朱茵懷孕後胸更大，Paul得戚地笑說：「佢一直好勁。」將為人父的他坦言未緊張：「第一次做老竇，朋友話我故作鎮定，自己都調整緊心情，可能嚟緊好多嘢做，7月喺紅館開騷，仲有電影配樂，都幾忙。雖然畀BB打亂陣腳，但我唔會取消工作。（叫大肚朱茵停工？）會，我會叫佢停一停，唔想佢咁操勞。（Book定產房？）唔使咁緊張，我諗應該有啩！我哋唔會擇日剖腹，都係揀順產，BB嚟都冇擇日啦！會唔會剪臍帶就未諗。」

Paul哥家燕姐被惡搞

有人抨擊身為基督徒的朱茵未婚懷孕，Paul淡然說：「唔介意，依家完全超越咗，唔需要再顧慮多餘說話，祝福我哋自然祝福，搞搞震嘅就繼續搞搞震，總之多謝晒。」而Paul昨日接受查小欣電台節目訪問，他透露朱茵當日喊住跟他說懷孕，自己窒一窒，還笑朱茵好烏龍，佗BB三個月都不察覺！現在朱茵很大食，Paul撲來撲去服侍，婚禮方面則不會鋪張，因想低調舉行，只請親友食飯。此外，有網友惡搞Paul和朱茵的相擁裸照，換上Paul哥秦沛和薛家燕的樣子，秦沛兒子姜文杰亦轉發取笑。