陳庭欣撻Q緋聞解密

港姐愛小生就如美斯踢巴塞一樣門當戶對，多麼天經地義。當劇情發生在陳庭欣（Toby）身上，先有黎諾懿後傳翟威廉，可算一樁美事。只可惜與黎諾懿的緋聞太過煲水；而翟威廉卻隱藏某些情感缺失，在Toby心目中，要喝的那杯茶仍未到口，已被熱辣辣的緋聞灼傷喉嚨。

近年港姐戀事多，朱晨麗和朱希敏情陷大隻港男已說明一切，但講到最神秘的，可算是先後跟小生黎諾懿及港男冠軍翟威廉傳聞的陳庭欣。為甚麼斷正仍像阿仙奴般漫無目的在禁區外搓波，不懂巴塞進攻模式直線傳入禁區射門，浪費了兩個黃金機會？Toby一語道破原因：「因為佢哋兩個都唔啱我！」

黎諾懿高大靚仔，人緣極佳，為何沒有下文？Toby說：「煲水成分太重喇！佢似我大哥哥多啲！有次我返內地做嘢！唯一識嘅只有黎諾懿，所以咪喺佢微博留言囉！咁就畀人話主動出擊，我同佢食飯三隻手指數得晒，次次都有一大班人，唔知點解會咁傳我哋！」

太過Man

始終黎諾懿是少有的筍盤，雖然不能進一步發展成為情侶，但對方的魅力依然迷倒Toby：「黎諾懿係一個真到不得了嘅人，我同佢真係好好傾，呢個圈好多人喜歡Hea你，但黎諾懿完全唔會，佢會畀好多建議我，教曉我做一個好藝人，會講真話直斥我不是，係一個不可多得嘅前輩！」Toby有兩個擇偶條件，第一是要有6呎高，第二是對方最多只能大她5歲，黎諾懿不合格：「佢的確好高大威猛，以前仲好陽光添，不過依家成個人Man晒，年齡比我大一截，似我阿哥多啲！我喺英國試過同一個大我七年嘅男仔拍拖，佢會覺得我想法太膚淺，連去沙灘漫步都嫌麻煩，點解拍拖要拍到咁辛苦先？唔想重蹈覆轍！」

唔啱傾

若說與黎諾懿的緋聞是煲水，那麼與翟威廉拍拖斷正，戀情應該真實得多，不過Toby有點嫌棄對方：「講真，我同佢真係唔係好啱傾，佢講嚟講去都係叫我要進步，要去學嘢增值，係，佢真係好有上進心，但除咗講呢啲之外，就冇其他嘢可以講，但佢又成日同我講自己唔係一個冇情趣嘅人，仲要係好浪漫嗰隻，唔係囉！至少我唔覺得係！」

女孩子有哪個喜歡不解溫柔的人？翟威廉着實要改變木獨性格，Toby說：「我好欣賞威廉，佢好學程度實在瘋狂得令人咋舌，好似學西班牙文咁，日日苦心鑽研，好努力咁不停讀，不過佢真係要識得去了解別人，唔好只活喺自己世界！」

兩個機會，換來一個沒有結果的結果，撻Q了，實在可惜。然而Toby卻說了實話，知道緋聞影響形象，她說：「兩單緋聞好夠喇！傳多單就真係會影響形象，覺得我靠呢啲上位，我真係好在意囉！」

報親恩

Toby選擇封嘴不講愛情，但談及親情時，卻如開籠雀般講個不停，在她眼中，父母養育之恩，無論如何都要湧泉相報，她說：「爸爸係一個警察，自小對我好嚴格，細細個就逼我做掌上壓、跑步同Sit up，紀律相當嚴明。到我12、13歲，因為希望我可以獨立就送我去英國讀書！爸爸同媽媽係有啲煩，但真係對我好好，我喺電視城開通宵，爸爸就會開架車喺出面等我，仲好耐性過啲記者，唔係人人可以做到，我唔知點去報答雙親，惟有做好自己，將一切畀晒佢哋！」

後記：柴可夫男友

訪問在元朗進行，小記先到，Toby在電話說轉個彎便到，只見一架靚車從遠而至，已嘀咕何家公子香車載美人？只見一名年約五十歲的男子為Toby開門，Toby打趣向小記說：「佢係我男朋友，我好愛佢，因為佢係我爸爸！」等了又等，Toby男友終於現身。