楊小娟轟等同偷嘢 李珊珊：終於攞番個公道

對於私隱專員公署的裁決，圈中人紛表歡迎，眾星亦各自表達心中感受。

李珊珊：「今次呢件事藝人終於攞番個公道，有番個新準則，叫啲傳媒以後唔好影到咁入囉！影人哋屋企入面真係好缺德，同埋嗰啲作新聞嘅報道對藝人傷害好大，我都做過受害者，我希望演藝人協會日後能夠做個平台，幫一啲藝人出頭，因為有啲演員好無助，畀人作新聞都冇得出聲，唔係個個都喺無綫懷抱，有樂小姐幫忙開記者會澄清，所以如果演藝人協會可以幫到呢啲藝人就最好嘞！」

諸葛紫岐：「呢啲不良傳媒梗係唔好啦！藝人應該有私隱，呢啲娛樂雜誌變晒質，應該檢討同有底線，掉番轉頭如果自己屋企人畀人咁影，都一定唔好受啦！」

黃德斌：「應該要尊重個人私隱，我住村屋，想望山望水，如果拉窗簾無意思，最多喺屋企着番條褲，同埋唔會喺窗邊親熱。」

張敬軒：「每個人都有私生活，加上（被拍嗰度）係私人地方，自己住8樓，24小時都要拉埋窗簾，我喺屋企最鍾意着衫同褲，唔會全裸。」

楊小娟：「當然係好事，始終影入屋係一件好唔應該做嘅事，同偷嘢冇分別，有時一啲嘢寫咗、登咗出嚟，對藝人影響好大，就算道歉都無補於事。」