發哥：真係過咗火 秋生：影入屋賤格

私隱專員公署昨日就黃宗澤和王浩信寓所被偷拍事件，裁定壹傳媒旗下的《忽然1周》和《FACE》違反私隱條例，對於不良傳媒肆虐，三大影帝周潤發、黃秋生和郭富城佛都有火，發哥指傳媒與藝人應互相尊重，秋生則怒插不良傳媒賤格，影衰娛圈形象！

壹傳媒採訪手法向來惹人爭議，去年更吊長鏡入屋偷拍藝人黃宗澤和王浩信屋內私生活，私隱專員公署昨日就此進行判決，裁定壹集團旗下的《忽然1周》和《FACE》違反私隱條例，鑑於傳媒不良之風愈吹愈盛，城中藝人更群起痛斥這些不良傳媒行為可恥。

「人人都有底線」

三大影帝周潤發、黃秋生和郭富城曾不同程度被不良傳媒滋擾，向來好好先生的發哥接受電話訪問時大吐苦水，道出被侵犯私隱的辛酸，問他是否對黃宗澤感同身受時，他說：「我覺得喺條街畀人影冇所謂，但我都試過畀人影（指屋企），有試過畀人喺對面樓影，亦試過有人爬高嚟影，總之各種方式都試過。我唔覺得呢啲係公眾利益，藝人都係人！」發哥又認為今次裁決是一件好事，藝人和傳媒是唇齒相依，不應越過底線：「我同好多傳媒交手過，不過有啲雜誌、傳媒真係過咗火，大家應該尊重，人人都有底線！」

「影裙底春光咁」

曾多次被不良傳媒惡意相對的秋生，沒有因為壹傳媒被譴責而息怒火，更在電話中痛陳不良傳媒罪狀：「其實演藝人協會為保護藝人私隱，投訴過好多次，好似我個仔畀人影，我都有去私隱專員公署投訴，但佢哋話個仔喺條街度畀人影，係冇問題，簡直係荒謬！」

對於不良傳媒偷拍手法，秋生火滾地說：「依家吊入屋影相，簡直賤格，好似入公廁影人屙尿、影裙底春光咁，依家無綫出頭先搞得掂，好似上次阿嬌（鍾欣桐）件事咁，不了了之，演藝人協會做咗好多嘢，但一路都冇成果，依家終於搞到，都開心，嗌啲不良傳媒自律吓，希望件事會有一啲懲罰性嘅嘢，否則都起唔到阻嚇作用，只會繼續荒謬，不過依家都好少少，有人兜巴星我哋，我哋都有得擋，有指引。」

至於另一影帝郭富城昨日出席活動時說：「我覺得係私隱，自己都係藝人，同記者係唇齒相依，知情權還知情權，報道要有守則，偷拍屋企要自律，我唔想同傳媒關係破裂。」對於曾被偷拍入屋，城城說：「我之前畀人偷拍過，依家落屋企泳池游水都驚，工作辛苦，返屋企想有自己空間！」