Mr.結他手月租6千焗住劏房

人氣樂隊Mr.雖然成功冒起兼在紅館開騷，但由於五子要平分收入，好睇唔好食，結他手Ronny買唔起樓，更要在市區租住劏房方便工作，辛酸到爆！

香港樓價愈炒愈高，一般人根本連首期也無法支付，原來藝人都深受其苦！據知，人氣樂隊Mr.五子都是無樓一族，成員Ronny更是租住港島區的200呎劏房，月租要6,000多元，他接受本報訪問時坦言：「層樓間咗3間劏房，有獨立廁所，都算有私隱！不過，我到依家都未見過同屋嘅租客！」

Ronny表示以往跟家人同住新界，不方便工作，故在港島區另覓屋租：「我都想搬大啲，因為依家住嗰度冇廚房，我好鍾意煮嘢食，不過要儲錢至搬到屋！（介唔介意畀人知住劏房？）我都係普通人，唔覺得太大問題，唔會覺得失禮人，又唔係打家劫舍，女友都唔介意！」

「過普通人生活」

Ronny坦言收入根本不夠買樓，以前任職Marketing（推廣）月入兩萬多元，現在當了歌手，收入跟以前差不多，他慨嘆：「雖然做歌手收入唔穩定，有時會賺多啲錢，不過我覺得都OK！其實我過嘅都係普通人生活，好嗰啲Artist（藝人）咪風光囉！但有幾多人好似陳奕迅咁出名、搵咁多錢！」他批評香港樓價太高，普通市民根本買不起樓：「我都想儲錢供樓，不過喺可見將來都買唔到樓囉！」

鼓手：杜志烜（Tom）

24歲

居住狀況：

與老婆何思諺及囝囝居於土瓜灣私人屋苑

結他手：黎澤恩（Ronny）

32歲

居住狀況：

獨居港島區劏房

主音：布志綸（Alan）

32歲

居住狀況：

與家人同住香港仔大型屋苑

結他手：譚傑明（MJ）

31歲

居住狀況：

居於土瓜灣唐樓

低音結他手：譚健文（Dash）

31歲

居住狀況：

獨居於土瓜灣私人屋苑