吳雨霏：夾喺中間好難做

俗語云：三個女人一個墟，那九個女人即是三個墟？Cookies出身的吳雨霏（Kary）承認組合年代存有不少是非，餅女中與鄧麗欣（Stephy）最老友，對於好友與傅穎（Theresa）傳不和，Kary坦言中間人唔易做，但從來不多加意見。

其實Cookies年代真係太多人，我比較好彩冇乜是非，可能我唔係同佢哋一齊住，9個女仔一齊一定有問題，大家性格唔同實有摩擦，坦白講，當年大家冇試過鬧交，讀書都會有夾同唔夾嘅同學仔，但唔代表唔鍾意，我對個個都好，可能當年我係最細，個個都好錫我同遷就我。大家唔會覺得我同鄧麗欣Friend，但係我哋會一齊去旅行，雖然大家性格唔同，我比較剛強，佢就較柔弱，但我哋話題又好相似。

冇分黨分派

事實上，從來都冇大家所講嘅分黨分派，有時真係覺得好無奈，傳媒問起時我夾喺中間真係好難做，鄧麗欣同傅穎兩個都係朋友，亦都唔會問佢哋究竟發生乜事，成件事係點同來龍去脈我真係唔知，自己同傅穎真係冇嘢，雖然大家依家唔同公司，但久唔久都會傳短訊慰問吓，唔想好刻意去約食飯同騷擾佢，我都有同佢講，有乜需要可以搵我，總之我個個都鍾意、個個都錫。

個人發展單飛嘅時候，我太保護自己，所以好難識到朋友，當時覺得圈內人好唔可靠，當人大咗思想就開放咗，開始識吓朋友，同朋友傾吓偈同約出嚟食飯，講到交心朋友，一定要數at17，因為大家同年出道，同盧凱彤比較Close，當然幾個女仔走埋一齊一定會講吓感情事，大家識咗咁耐有個信任喺度，唔驚會爆響口。（明日待續）