周柏豪連詩雅 沉默深閨

周柏豪和連詩雅這對同門師兄妹，先後捲入「愛情三角錯」風波。柏豪跟陳山聰傳因「奪雲戰」而是非不絕，柏豪坦言已經學精，不回應是非；連詩雅早前被指「小三」，雖曾感難過，但仍樂觀面對。

前年10月，周柏豪跟賭王何鴻燊三房千金何超雲開始傳緋聞，當時超雲曾表示不排除跟柏豪有發展機會，柏豪亦承認對超雲有好感，更被冠以「未來千億女婿」之名。豈料之後是非連連，柏豪除被指與超雲傳緋聞博上位，又盛傳跟陳山聰在微博開火！柏豪急急與超雲劃清界線，及後超雲坦承與山聰熱戀，柏豪亦宣告「甩難」！

「同山聰冇接觸」

事過境遷，柏豪日前受訪時表示，現在處事更成熟：「確係加速自己成長，有時回應報道心急咗，後來先知可以選擇唔回應，學識咗禮貌地Say No﹗」他坦言若傳緋聞尚可解釋，但對是非寧願選擇不回應：「因為是非只會愈描愈黑，變咗是非就唔想再答，而我同山聰從來冇接觸過。」

除了超雲，柏豪去年亦跟吳雨霏（Kary）傳緋聞，本月17日是柏豪舉行處男演唱會的大日子，問到會否邀請超雲欣賞？他說：「冇呀，唔會特登提。」不過他邀請了緋聞女友Kary欣賞：「佢反而問番我介唔介意，我話好簡單，朋友開騷嚟支持，唔使諗得太多，唔好畀呢啲（緋聞）影響友情。」

唔介意露股演出

將開處男個唱的柏豪未有因此而緊張：「可能之前參加過其他音樂會演出，呢一刻唔算緊張，反而開心。（跳舞？）唔會啦！最勁嘅嘢留番喺大啲嘅場地演出。（露肌肉？）未係時候，唔會搞太多花臣，想以音樂行先，今時今日我唔只係偶像派，我想上台嘅係一隊Band，多過自己一個人唱歌，因為咁樣更加有氣氛。」

今年在樂壇頒獎禮成績斐然，首度獲叱咤男歌手銅獎的他，被問到是否豬籠入水？柏豪說：「舊年係賺多咗，希望年年都係咁。」曾參與電影演出的他說：「我唔會當係主打。（露股演出？）唔介意，但睇吓係乜嘢角色，唔係賣弄淫褻色情就得。」

後記：入行6年夠歷練

入行6年才首度開個唱，對柏豪來說應相當難忘，但他卻以平淡心情迎接。畢竟入行年資不淺，飽歷高低起跌，看盡風雨，就是有這樣的歷練，才能有這樣處變不驚的心態。

人怕出名豬怕肥，女歌手連詩雅（Shiga）近日被連環翻舊帳，除了被爆「喜愛夜蒲」及煲煙攬仔，又指曾戀上好姊妹楊愛瑾（Miki）的緋聞男友、永安百貨太子爺郭永淳，背負「小三」之名，Shiga對此逐一解畫：「細個有玩過，亦貪玩試過食煙，但依家生活好規律。（愛夜蒲？）唔係好想蒲，有外國朋友返香港，約出去食飯飲嘢。除夕我都喺屋企同屋企人倒數，人大咗深閨咗。（形象受損？）經歷過呢啲事後，識珍惜依家擁有嘅嘢。」

分手始知有老婆

問到日後與男性朋友外出會否避忌？Shiga說：「有啲，連累朋友見報要講聲唔好意思，就算同男性朋友影相都唔會太親密，但同朋友搭膊頭，只係高興嘅表現。」至於「小三」一詞，更令她感到不是味兒，更為報道哭過：「嗰時得16、17歲，冇問佢（郭永淳）有冇老婆，大家拍咗幾個月拖就分手，之後先知佢有老婆。」

同Miki有傾有講

Shiga無奈地說：「其實由第一日變成公眾人物，公司同事已經叫我要有心理準備，好多嘢會畀外界放大十幾萬倍。（見Miki尷尬？）我哋見面有傾有講，仲一齊跑步、食飯。」Shiga表示以前EQ很低，但入行後「被迫」變高。此外，單身的她透露擇偶條件：「要有上進心、有目標同唔怕辛苦。（有冇人追？）唔抗拒人哋追，但要體諒我工作，同埋要了解清楚先諗交往，因為有啲嘢呃得一時，呃唔到一世，如果相處半年咁都畀對方呃到，佢真係好勁。」

歷盡百般是非，難免令Shiga變得更謹慎，做每個決定前都會停一停、諗一諗。就像去年她參演電影《喜愛夜蒲》，在片中飾演蒲精的她不乏大膽演出，原來她在接拍前曾掙扎過：「依家觀眾接受能力高咗，初頭接拍都掙扎過，不過師兄師姐同我講，只係戲中一個角色，唔代表真人係咁。」

後記：視柏豪為哥哥

跟柏豪同公司的Shiga，向來視柏豪為哥哥：「佢畀我睇佢錄音情況，睇吓點樣做好音樂，係好值得尊敬嘅師兄。」二人均捲入愛情三角錯，相信這一役會令他倆更惺惺相惜。