華哥無悔濫拍：咁先磨練演技

任達華入行34年，拍過的電影多不勝數，由90年代初接拍的大膽前衞戲到今日的慈父角色，個個角色都演繹得淋漓盡致。驀然回首，他表示每個角色都是自願演出，才能成就今天的影帝級演技。

拍戲咁多年，完全冇試過對女對手心動過！因為我知道呢個係拍戲，唔係現實。雖然依家科技發達，但我從來唔會同網上人傾偈，連Facebook都唔會玩，因為咩都係假嘅！我唔會沉迷喺呢個虛擬世界，就等於我哋拍戲一樣，都係虛擬世界，「佢」唔係任達華！動心？只會喺戲裏面有，但拍完之後……對唔住，大家都抽番身出嚟。

我個女淨係睇過我兩部戲，一套係《PTU》，另一套係《歲月神偷》，大咗會畀佢睇我其他戲，因為到時佢會有分析能力。暫時嚟講，我以前拍嘅戲，係唔可以畀晒個女睇，因為尺度比較大膽同暴力。我以前唔係冇揀戲，啲角色都係我鍾意做嘅，因為身為演員，鍾意咩角色都演。話我以前拍嘅角色同依家正派角色完全唔同，其實又唔關事，係當時個時勢問題，以前興動作戲、槍戰戲，我係一個有表演欲嘅人，畀我有得表演就會去做，唔會話做死一樣，咁樣先可以磨練到自己演技、EQ，如果演嚟演去同一個角色，咪唔好睇囉？

攞獎隨遇而安

90年代有冇逼演員拍戲呢回事？應該係話，嗰段時間我哋演員能夠做到啲乜呢？唔緊要，咪繼續拍囉！盡量喺戲裏面做好自己個角色，觀眾對你嘅印象係會一路沉澱，慢慢睇到我由以前咁變到依家咁，覺得我個Range會好大，而唔係話我做得一類角色。一個世界裏面有唔同嘅人，如果乜都演過嘅話，人生會有唔同思想，唔同危機感，以前拍過嘅角色一定係豐富咗我人生經歷，因為做唔同角色，我都會Search資料。

我最深刻印象係《PTU》，因為感覺好有正義感同解決到問題，無論家庭定公司入面，最重要係解決到問題，同埋套戲講友情，人生有情，先會對家庭負責任。我對再奪影帝嘅心態係隨遇而安，最緊要開心，好似獎金獎品咁，有獎金未必有獎品，一切隨遇而安心情會好啲，樣樣都爭會變到好孤獨，好似有啲大公司嘅CEO咁，好叻但隱蔽喺山洞度，唔係話成功就會冇朋友，但凡事唔需要強求。（明日待續）

口述：任達華　筆錄：名人組　攝：林楠