李添勝鬧爆無綫Niki掃貨冇Mood

周麗淇（Niki）主演的電視劇《我的如意狼君》進入結局周，劇集贏口碑卻輸收視，監製李添勝怒轟劇集收視差，他更曾怒氣沖沖踩上節目部質問抽起原因。而Niki則因《我》劇收視低而影響掃貨心情。

李添勝為無綫老臣子，近年得意之作《巾幗梟雄》更是有口皆碑，據知無綫知道添哥打算明年退休，故將添哥監製的《我》劇從10月黃金檔，「監生」燉落聖誕炮灰期，由汪明荃主演的《荃加福祿壽探案》頂上，搞到年屆64歲的添哥佛都有火。

《我》劇本周進入結局周，無綫安排本周日（1月1日）播較重口味的《天與地》大結局，《我》劇大結局則安排下周一（1月2日）播出，可謂被節目部高層一燉再燉。記者致電添哥了解，對於作品變成炮灰，他怒轟無綫：「實有人食PK檔，我以前套《鐵馬尋橋》都食過，都嬲唔得咁多，況且我又唔係第一個，都冇話炮唔炮灰囉！」

踩上節目部質問

添哥表示，無綫此舉令《我》劇台前幕後意興闌珊：「唔可以講大話，收視真係普通，最慘係口碑好，搞到啲編劇仲唔開心。唉！假期有60、70萬人離港，如果擺黃金檔起碼高兩點收視啦！不過我都慣喇！」

添哥更踩上節目部質問《我》劇被抽起原因：「我認《我》劇唔係大堆頭粒粒星，不過Niki進步得好快，浩然又好適合個角色，我好畀心機度呢個故事，成件事都有計算，當安排10月檔仲以為一定得，點知畀節目部抽起，話有某啲原因喎！仲同我講對唔住！」談到退休問題，添哥說：「明年底滿65歲，同事見我行路拐吓拐吓，就知自己體能唔得！」

然而添哥為Niki合約問題押後拍《我》劇，Niki一直對該劇寄望甚殷，如今收視麻麻，難怪Niki前日到中環Shopping時滿臉愁容，身邊好友卻滿載而歸。對於《我》劇做炮灰，劇中飾演徐芯的Niki說：「好難控制公司編排，好開心口碑好囉！但唔知收視點計算！」談到李思捷在福祿壽節目中以鬚根Look扮徐芯，她笑說：「佢係男人梗有鬚根啦，真係好好笑，唔緊要！」