鍾一憲麥貝夷強忍愛意做拍檔

組情侶檔後大受網民歡迎的鍾一憲（Jason）和麥貝夷（Karene）頻頻孖住搵銀，雖然日見夜見互相過電，但兩人無意將關係昇華變成真正情侶，寧願維持密友關係，享受曖昧感覺。

樂壇新人鍾一憲和麥貝夷出道一年多，早前組情侶檔合唱歌曲《勾手指尾》大受歡迎，趁勢頻頻一起接Job賺錢，Jason說︰「梗係開心啦！有時上網睇番Fans留言，自信心都增加。」Jason與Karene早被Fans公認為一對，人前人後十分合拍，Karene說︰「我哋相處有一種初戀嘅感覺，覺得好似識咗好耐咁。我哋好有默契，平時出活動冇夾過着咩衫，但都會好Match！」

玩曖昧心癢癢

Karene與Jason因工作朝夕相見，問兩人會否日久生情？兩人坦言互生愛意，但不會讓關係再進一步，只做工作上的拍檔︰「大家都有Feel嘅，但唔想打破依家嘅關係再進一步，反而曖昧嘅感覺幾開心，感覺好OK！如果拍拖後分手就會冇咗呢種關係。」

安於現狀的兩人繼續情侶檔出新歌，Jason透露新歌MV會與Karene有一幕床戲︰「開頭以為要除衫，走咗去做Gym，希望大隻啲，點知到拍先知要着衫，做Gym都嘥氣！」在旁的Karene即時氹番Jason︰「唔係呀！你做完Gym後我摸落覺得好實呀，感覺幾好。」Jason聽後即時冧爆。