Uny拋寶牒 望愛情如「妤」得水

「中國小姐」趙哲妤（Uny）早前到大埔林村出席慈善盆菜宴，更到附近許願樹，首次拋許願寶牒的她大叫過癮，除祈求愛情事業皆得意外，更希望再跟男友到林村拍拖許願。

去年「中國小姐」香港區冠軍Uny，早前亦應「香港廣西桂林市同鄉聯誼會」主席洪响堂先生邀請，與一班今屆候選佳麗入大埔林村參與慈善盆菜宴，不過活動結束後大家並未離去，紛紛衝去許願樹祈求一切順利。

而被踢爆跟有米富二代拍拖的Uny，除了祈求事業順利外，更有望愛情順風順水，她說︰「第一次嚟許願樹許願，拋寶牒幾好玩，今次當然希望各方面都順順利利。」問到寫了甚麼在許願寶牒？她甜笑說︰「都係求事業順利、屋企人健康，咁愛情都梗係希望如意啦！好似好貪心，不過呢啲都係意頭嚟。」問到為何不帶男友來許願？她笑說︰「佢要做嘢，有機會都想同佢嚟行吓，不過依家大家都想事業行先，有時間先諗去拍拖嘅嘢。」

讚佳麗有特色

此外，Uny當日趁機與候選佳麗分享參選經驗及貼士，問到睇好哪位能成功奪冠？她說︰「個個都有特色，唔識點答，費事畀人話偏心！」而一班候選佳麗則表示不介意賽果，能參與其中已十分開心，又直言今次參選獲益良多，可參與做善事甚具意義。問到是否想藉參選入娛圈？佳麗均表示想入行見識，希望能闖出一番事業。