MJ畫眼線：想畀人研究

樂隊Mr.結他手MJ（譚傑明）憑邪氣眼線、黑色指甲成為另類潮人，原來他喜歡素顏才華女子，不用跟他一樣貪靚！他自爆入行皆因可以被人影相，成為研究對象！

自與前DJ卓韻芝分手後，MJ表示已有新戀情，女友經朋友介紹：「女友鍾意藝術、鍾意靚嘢，同我傾到偈！」但他不想女友被騷擾，故不願詳談，不過他願意分享擇偶條件：「我鍾意有才華、才藝嘅女仔！我喺加拿大讀書，鍾意過一個畫畫好叻、好有藝術天分、好沉迷宗教嘅中國女仔！（同你一樣貪靚？）唔係！我鍾意女仔唔化妝，有個長輩話過，如果有個女仔化少少妝已經靚，佢唔化妝都唔會差！（同你好大對比喎！）係，因為我鍾意做呢行，我搵唔到第二行可以玩造型，又可以畀人影相，又可以成為人哋嘅研究對象！」

陳柏宇有樣學樣

問到是否很想被人注意？MJ說：「唔係真係想引人注意，當初畫眼線係因為入行之後，有一日我突然覺得我影相個樣好攰，雙眼好冇神，咁就想試吓化妝會唔會好啲！（有人唔鍾意你化！）一定有人唔鍾意，男人老狗！其實每做一樣嘢都一定有人鍾意同唔鍾意，與其去跟大家，不如自己為自己定準則！」他自覺畫眼線後，連DJ森美開騷、陳柏宇早前於電影《喜愛夜蒲》中都有跟風畫眼線。

新書暗講卓韻芝

向來貪靚的MJ表示，在「時裝潮流」與「音樂」中二揀一的，他一定會揀音樂：「如果我有兩萬蚊，我會買支結他，唔會去買一件好貴嘅衫囉！」另外，他將推出新書《天馬行空》，輯錄他寫過的專欄：「會講樂壇、夾Band、點睇個世界。（感情事？）比較少，不過都會講吓經歷。（卓韻芝？）唔會開名講囉！」