任賢齊不屈不撓再創高峰

歌手任賢齊（小齊）入行21年間挫折不少，如在《神鵰俠侶》演楊過被網友拿來與古天樂比較，並鬧爆他不夠英俊；亦試過被相士批命「唔會紅」而失掉工作機會，一度陷於事業與情緒的低潮。當時「好Hurt」的他不肯放棄，誓要創造下一個事業高峰！

任賢齊入行後有起有跌，最令他傷心的，莫過於被鬧「樣衰」！當年拍攝《神鵰俠侶》，演主角楊過的他努力演好角色，卻遭網友大鬧，小齊說：「因為古天樂做過，有人去比較，話我樣衰！我真係好Hurt呀！不過唔同意見都要虛心接受。」他當時擔心會得抑鬱症，因為好友台灣歌手徐懷玉等人都因工作壓力而患有此症，他說：「所以做人一定要保持平常心、樂觀！」

他亦試過因為投資者迷信，着他去睇相，結果被批不會紅：「嗰時本來要簽約，點知佢話我唔會紅，最後就冇咗單工作，真係好Hurt！」所以小齊即將推出的新碟《不信邪》，就是要表達就算遇上挫折，也不要「信邪」，要繼續嘗試直至成功。

勝不驕敗不餒

90年入行的小齊等到97年才憑《心太軟》一曲爆出：「當時隻歌好紅，賣咗成百萬隻，我好驚要點保持，又有人批死我下隻歌唔會紅，其實面對成功都唔易。」他當時的好友林志穎及金城武早已走紅，所以向二人取經，學習面對成功而不驕的心態：「做人唔可以成功就有『大頭症』，一朝得志、語無倫次！」