高海寧甘陪跑馬賽自詡有A

台慶頒獎禮將至，除了視帝視后爭崩頭外，其他獎項亦競爭激烈，同是港姐出身的馬賽與高海寧，今年齊齊角逐「飛躍進步女藝員」，但仍無損姊妹情，雙雙晒Chok樣兼扮錫錫，打破爭獎與是非的必然關係！

姊妹情深抑或爭獎重要？馬賽與高海寧今年選擇前者，雖然雙雙入圍「飛躍進步女藝員」，但二人依然Friend過打Band，拍攝時默契十足。胸無城府的高海寧直言甘願陪跑：「我同馬賽都係港姐出身，睇住佢一路劇接劇，表現有進步，自己就留喺綜藝節目，所以我都有上網投佢一票o架！（信心？）一啲都冇，但其他四位入圍者就叮噹馬頭，嗰晚咪當扮靚，順便八吓邊個攞獎。」

以阿佘為目標

問到會否希望如馬賽般頻拍劇？她恨到出口，並感謝監製李添勝邀她參演《天梯》：「呢套劇令我開竅，希望好似海綿咁愈吸愈多！」

至於馬賽則自信爆棚：「今年好多劇出街，觀眾都睇到我嘅進步，成績表冇A都有A-啦！（信心？）有o架！但保持平常心，唔想希望愈大失望愈大。」她又感激前輩的鼓勵：「Bobby哥（歐陽震華）同麥包都話睇好我，但前者話攞獎係命運，自己控制唔到，其實得到行內人認同已經好開心。」

雖然馬賽謙稱演技略欠火候，但亦以視后佘詩曼為目標：「我想好似阿佘咁，演咩似咩，每部戲都好似考試咁，希望一套比一套高分！」