無意追龍B小齊畀仔女玩謝
育有一子一女的歌手任賢齊，對於近日娛樂圈喜事重重，他亦大感驚喜，但未有計劃再追：「依家兩個小朋友已經手忙腳亂喇！」
任賢齊（小齊）昨日以一身白馬王子Look，舉行新碟《不信邪》發布會，並宣布明年2月18及19日於紅館開騷，他預告邀請好兄弟五月天、陳昇及黃品源任嘉賓，而魔幻力量則擔任大會樂手。
預告個唱晒肌
五月天昨日專程來港力撐，更大讚小齊專業，即使肋骨受傷仍堅持錄音，令他們非常佩服！小齊笑說：「我知自己做唔到郭富城，不過都會有少少簡單嘅跳舞動作！」他聲稱身形比五月天好，不排除屆時除衫騷肌肉。
對於近日黎明嫂樂基兒及楊千嬅等分別傳出懷有「龍B」，已為人父的小齊驚喜反問：「真定假呀？我自己做老竇，真係感受到新生命嗰種喜悅，大過攞獎或者演唱會爆滿，成就感唔同！（追番個龍B？）唔使喇！多謝晒！依家兩個小朋友已經手忙腳亂，夠喇！」
任賢齊將於明年開紅館騷，昨日公布詳情。
小齊（右三）獲五月天撐場，令他相當感激。
粉絲送上鮮花，小齊自然喜上眉梢！