徐子珊等真命天子送鑽戒

徐子珊及謝天華昨日情侶檔為《英皇珠寶「帝臻寶鑑」珠寶首飾預展》擔任嘉賓，戴上數百萬元鑽飾的子珊難掩恨嫁的心！而天華則自爆結婚多年仍未送婚戒給老婆！

徐子珊及謝天華昨日分別佩戴760多萬元及340多萬元鑽飾，到澳門英皇酒店為珠寶預展擔任嘉賓，英皇鐘錶珠寶董事總經理楊諾思亦有到場。戴上價值逾400萬元鑽戒的子珊笑言從未收過鑽戒：「媽咪話鑽戒唔可以亂收！我希望第一隻係老公送！（想快啲收？）想o架！不過要講緣分，其實我眼角唔高o架！我唔會貪心要收咁大粒鑽戒，心意重要啲！最好喺外國求婚啦！仲要有花！唔使99支，簡單就得！」

天華奪視帝補送婚戒

自言是「浪漫主義」的天華憶述在外國雪山的求婚經過：「我本身買定一卡鑽戒，出發前擺入背囊，點知喺車畀人敲爛玻璃成個袋偷走咗！（補買？）本身想喺當地買番隻，但老婆驚太急買唔到心頭好，所以冇買到！」他至今仍未補送婚戒，問到若今年奪視帝會否補送？他說：「希望下年買啦！要精挑細選o架嘛！（老婆冇出聲？）結咗婚都冇得『哦』啦，但我一定會補送！我唔介意買大隻鑽戒畀老婆，證明我有能力！」子珊笑言希望天華嫂的遭遇不會發生在自己身上。

此外，天華又指鑽石永遠是女性的好朋友，但男性戴鑽飾應選擇陽剛味較重的款式，提到早前黃宗澤（Bosco）遺失緋聞女友胡杏兒所送的鑽石耳環，天華笑說：「Bosco咁姣，佢戴咩都得啦！」而子珊亦不禁笑說：「Bosco真係我見過戴最大粒鑽石嘅男人！」