馬浚偉避合照 懶睬樂易玲

昨晚逾百名無綫藝員出席一年一度的台慶亮燈儀式，但陣容比往年遜色，只靠黎耀祥、林峯和陳法拉等撐場，而打算解約的馬浚偉則獲安撫，被安排企第一行近中間位，但他與高層樂易玲拒絕合照，擺明唔畀面，言談間更似有離心。

最近無綫飽遭內憂外患，昨晚129位藝員雲集電視城出席台慶亮燈儀式《非凡夢想 邁向45周年》省招牌，但避開44周年的字眼，未知是否怕「意頭唔好」！大合照企第一行的藝員包括黎耀祥、張可頤、林峯、胡杏兒、黃宗澤、陳法拉、吳卓羲、徐子珊及馬浚偉，鄭裕玲與福祿壽擔任司儀，主席六叔邵逸夫則在應屆港姐陪伴下出場。

陳豪鄭嘉穎缺席

有指馬浚偉因不滿無綫幫他推走內地劇及受冷待，令他死心而向樂易玲提出解約。昨晚所見，因當家小生陳豪、鄭嘉穎及郭晉安缺席，馬浚偉即獲無綫出招安撫，罕有地「升呢」企第一行近中間位置。祝酒儀式時，高層曾勵珍叫杏兒、黎耀祥及馬浚偉等齊齊切蛋糕，馬浚偉與傳不和的樂易玲亦有碰酒，但兩人拒絕合照，似乎仍有心病，馬浚偉更以「好忙」為由想閃，與他友好的曾勵珍即出手解圍拖他離開。

對於有指獲六嬸方逸華點名挽留，馬浚偉表示未有聽聞，而他暫時忙於為TVB拍攝《當旺爸爸》，故未有時間傾約，兩周後去向相信會更明確，但言談間似已有離心：「唔係錢問題，我喺無綫18年，今日抱住開心心情支持，到最後點都好，都唔影響TVB對我嘅恩情，TVB都係我娘家，即使第日有咩轉變，都只係合作模式。」他又指將返內地拍劇，明年才返港。

高層交足戲扮Friend

此外，幾位高層亦交足戲扮Friend，希望以團結定軍心，被指曾在法庭頂證陳志雲的李寶安，昨與志雲坐隔籬，期間咬耳仔扮好傾力證冇芥蒂，志雲亦幫手推着坐福祉車的六叔離開，身後的樂易玲更與六嬸拖晒手。對於陳山聰缺席，樂易玲解釋他正忙於拍《天梯》。