李蘊靠溝

感情篇：

早於12歲以童星身份闖樂壇的青春女歌手李蘊，曾組成少女組合Cream，不經不覺，她已入行8年，由當初嬌滴滴的小妮子，經過時間洗禮，現時變成亭亭玉立的少女，現年20歲的她，最近與台灣魔術師劉謙爆出戀情，締造了魔法情緣！「劉李戀」爆出兩個多月，雖然男友未能經常陪伴在側，但她並不介意：「佢唔係成日喺台灣，佢要周圍走！（少咗見面？）咁又唔會，我又唔係好黐身，大家都有空間！」

由於二人年齡相距逾10載，問到會否成為障礙？李蘊滿有信心說：「唔係囉！我個樣後生，但思想成熟！佢雖然年紀比我大，但個樣好細個，拉勻番！（家人反應？）佢哋好支持，尊重我嘅決定！冇得阻撓嘅，我都大個女啦！」至於如何維繫兩地情緣？李蘊說：「每日一定有聯絡，無論係SMS或者電話！（郎才女貌？）我最欣賞佢嘅才華，最緊要係大家溝通到，傾得埋，唔好畀年齡限制！」

「唔會特登玩魔術」

劉謙魔術耍家，平日有否露兩手逗她開心？李蘊笑說：「佢唔會特登變畀我睇，又唔係同事，我哋嘅話題反而少談及魔術，雖然我對魔術有興趣，但佢唔會點教我，呢啲係佢嘅財產同搵錢工具，只係有時我識嘅魔術，會請教佢點樣可以做得更仔細！（佢唱歌畀你聽？）佢唱歌OK o架！把聲好似張信哲。（介意你拍寫真？）佢OK呀！仲會畀我意見，好難得！」

對外篇：

自戀情曝光後，外界亦有不同聲音，李蘊坦言備受攻擊：「我唔怕攻擊嘅，依家我冇乜Update微博，最多擺工作上嘅嘢！（訓練EQ？）都係呀！慣晒啦！我哋盡量都唔提，好少睇啲評論！（有冇問男友嘅過去？）大家都清楚大家嘅過往！（佢有好多飛來蜢？）呢啲睇定力，我都好多人埋身o架！但我哋坦白同互相信任！」由於劉謙粉絲眾多，令戀情構成無形壓力，她表示不會經常將戀情掛在嘴邊：「可以講少啲嘅，始終佢粉絲好多，成日攞出嚟講會好敏感！」

至於公開戀情會否令「宅男」夢碎，李蘊說：「有小部分啦！（安慰佢哋？）佢哋鍾意我嘅話，會愛屋及烏嘅！」談及結婚問題，她說：「將來都會結婚，呢個係好多少女嘅憧憬，不過依家太遙遠，我哋享受緊拍拖樂趣！」另外，提到曾與唱作男歌手周子揚傳緋聞，問到日後見面會否尷尬？她說：「都會呀！不過我哋都冇聯絡喇！」

後記：寫真唔Cheap

寫真大戰結束後，李蘊埋首錄個人大碟，對於寫真獲外界讚賞，令她相當感激：「好開心！因為本身係歌手，影嗰陣都會顧及歌手身份，今次係最大底線，出嚟效果係健康性感，唔會有低俗感覺！」