William企硬

做偶像派確實辛苦！尤其要將戀情公告天下，少點EQ也不能應付四方八面的聲音！陳偉霆與蔡卓妍去年爆出姊弟戀後，經常被網民惡搞，但他心平氣和撐住，對惡意批評不聞不問！青春女歌手李蘊與台灣魔術師劉謙相戀，亦惹來不少批評聲音，但她相信只要二人溝通得宜，絕不怕攻擊！

感情篇：

陳偉霆（William）去年與蔡卓妍（阿Sa）爆出姊弟戀，震撼娛樂圈！戀聞曝光後，二人成為追訪對象，William更屢遭網民惡搞，難得他未被擊倒，反而考驗了他的EQ：「原來我嘅EQ都算高，完全冇影響心情，以前有諗過點解啲人要『搞我』，其實批評我係絕對接受，但惡性批評就絕不容忍，我選擇唔理會！初頭都會驚，但又冇影響過工作，點解要為呢啲無謂嘢影響自己呢？反而呢啲惡意批評好似催化劑，會令人堅強！」

至於有否看過「惡搞MV」？William不置可否：「唔會刻意睇！呢個社會有好多人，實有人唔鍾意你，但同時亦會有好多人支持自己！我好享受工作！（阿Sa睇過惡搞MV？）冇喎！我哋唔提呢啲，啲人愈整蠱我，我就愈企喺度，邊個贏邊個輸，某程度上係挑戰，遇強愈強！」

自信是好爸爸

自與阿Sa相戀後，William表示未想過結婚：「未諗喎！暫時唔喺Planning之內。（生BB？）好希望！如果生仔就可以一齊打拳、滑水。」他自信將來是開通的父親：「做父母唔可以咁死板，我諗我會係Open-minded嘅爸爸！」雖然戀情是公開秘密，但他認為少說為妙：「同阿Sa都有共識，大家搏命做嘢先！（結婚會公開？）唔會講！」

事業篇：

近年William在影壇火速上位，成為影圈新貴，惟他謙稱：「唔好話上位，只係畀人認識自己！我對拍戲冇乜特別要求，杜汶澤教我點做一個演員，佢話要冇乜要求，先可以做好演員！（紅咗？）點樣先算紅唔紅？依家有嘢做，又試到咁多嘢，我冇理自己去到乜嘢位，今年學識放低好多嘢，咁樣就有更多嘢擺落隻手！」

William直言拍戲令他成熟不少：「樂壇接觸嘅圈子較細，好多時都係喺活動見面；但拍戲唔同，長時間對住一大班人，真係多咗班朋友！我好鍾意同比自己年紀大嘅男人做朋友，好似陳輝陽、潘源良咁，佢哋令我學識點樣做男人。（女性朋友呢？）我當G.E.M.（鄧紫棋）係妹妹，大家傾無聊嘢居多！」

後記：「估你唔到」

William將推出新碟《WOW》，以色彩斑斕的跳舞歌手形象示人，唱而優則演的他表示演戲有太多「估你唔到」的狀況：「拍戲有好多可塑性，拍戲時要放低做歌手嘅包袱，演戲還演戲！」