薛凱琪冧大同柱女扮樹熊

被薛凱琪視為救命恩人的方大同，多年來一直守候在其身邊，最近更傳出秘密翻撻！日前，薛凱琪抽空陪大同踩單車做運動，期間搞笑地攬實燈柱扮樹熊，氹到大同哈哈笑！

自爆曾患上抑鬱症並想過自殺的薛凱琪（Fiona），幸獲方大同這位「救命恩人」開解才得以重生，而她亦不禁透露大同在她心裏面地位超然！與房祖名傳緋聞多年的她，有指這段地下情早已玩完，而一直默默守候的大同終成功打動其芳心！

撐枱腳Share意粉

日前，二人戴上情侶帽在Cafe甜蜜撐枱腳，並不時喁喁細語，由於大同茹素，Fiona細心地點了一碟素菜意粉兩份食，期間細聲講大聲笑，最後由大同埋單。離開Cafe後，二人到附近CD店Shopping，經商量後買下3隻DVD，再結伴逛傢俬舖，離開時，有女Fans要求與大同合照，Fiona即時耷低頭離開，在停車場會合大同乘保母車走人。

原來二人還有「下文」！保母車直駛大埔科學園的單車徑，可能Fiona見大同將於月底開騷，特意陪他踩單車練氣。大同熟手地由車尾箱取出兩部單車，並為Fiona調校座位，然後展開單車之旅。單車徑人來人往，大同沿途跟在Fiona身後護駕，有女途人認出他們並說：「方大同、薛凱琪呀！原來佢哋係真o架！」踩了約一小時後，二人走到少人的海旁位置玩互拍，Fiona更即興扮樹熊跳上燈柱，而大同則踎低用手機為她拍照。

Cute爆啜冰條

其後，二人沿海旁推着單車到小食店，Fiona雀躍地選了一支西瓜唧唧冰，而大同則買水解渴，休息一會後再慢步離去。對於再被撞破拍拖，二人所屬的唱片公司華納例牌否認：「唔係，佢哋係好朋友啫！」