蔡楓華忘形趴地 甩帽禿住唱

蔡楓華（Ken）前晚假廣州舉行演唱會，全晚裝酷的他因跣腳而當眾趴地，最慘情是連帽也飛脫而暴露了他「頭頂禿」，常揚言創造神迹的他，今次卻未得上帝眷顧。

今年51歲的Ken假廣州天河體育館舉行演唱會，全程黑超、潮帽不離身，一臉Chok樣，可惜腰太肥，衫、褲太窄而凸顯了「中佬腩」。

死撐羅文都跌過

當他大唱陳年金曲《IQ成熟時》時，一身白馬王子Look的他突然人仰馬翻撻落地，更因衝力過大令帽子飛脫，其頭頂的「地中海」頓時曝光，狼狽之極的他仍「死撐」，瞓在地上、戙起單腳繼續唱及不忘戴回「遮禿帽」，再若無其事起身，最叻自吹自擂的Ken說：「當年阿文（羅文）都跌低過起番身。」

其後Ken唱《白馬王子》時又說：「我跌過一次起番身，第二次又起番身，呢次係我第三次又起番身，呢啲就係我所講嘅神迹！」未知是否「跌開有條路」，他唱《愛不是遊戲》時，站在旋轉台的他曾失重心，幸好只仆一仆未有跣落地。完騷後，Ken遭大班中女粉絲包圍，又摸頭又送抱，他多次用手住帽似有「甩帽」陰影。

安歌時，演唱搞手孫敬安上台與他手挽手謝幕。慶祝宴上，孫敬安和太太盧敏儀開香檳順道慶祝結婚十四周年，孫敬安表示這是最後一次和Ken合作：「我功成身退，但都希望佢前途似錦！」