忠仔送書思浩嗌抽水

梁榮忠和梁思浩昨日在書展打對台，由於忠仔頂替了思浩的電台節目，令兩幫Fans結怨，昨日忠仔踩場送書給思浩時，不但被對方Fans怒罵抽水，思浩更寸嘴還擊。

除了一班o靚模在書展鬥出火，連忠仔及思浩兩個大男人亦客串一場明爭暗鬥！思浩的電台節目《瘋Show快活人》節目由忠仔頂上主持後，昨日他們分別在書展搞簽名會。忠仔突然帶同數名年輕DJ踩思浩場並說：「前輩，送書畀你，多多指教！」思浩道謝後尷尬收下，但其Fans看不過眼高呼：「抽水呀！」還對思浩說：「我冇聽佢節目o架！」事後思浩暗寸：「人哋嚟抽水，藝人冇得出聲，但係Fans錫藝人會出聲，當時突如其來都唔知畀咩反應好。（同忠仔有芥蒂？）我哋唔係好熟。（有冇嬲佢抽水？）邊嬲得咁多人？」

而對於被思浩Fans大罵抽水，忠仔說：「預咗，但唔過去又驚人唔知講乜。我同思浩冇嘢，係佢離開電台之後我先做佢個位，唔係我用手段爭番嚟，大家都明！」

克勤為愛兒揀書

此外，身為忠仔好友的克勤，當日忠仔開咪時亦到電台撐場。昨日克勤以代言人身份出席書展兒童英語教材簽約儀式時表示，閒時常為兩名愛兒搜購益智書籍，奈何「細老闆」卻不領情：「大仔我一啲都唔擔心，畀本書佢可以靜靜咁睇一個鐘，但細仔冇興趣，希望佢見哥哥咁鍾意讀書會有樣學樣啦！」