碩之DaDa谷爆寸口出狂言

書展臨近尾聲，眾o靚模為求力谷寫真，盡地一煲出口術互片！樹敵最多的何佩瑜（Jeana），前晚又發揮寸爆「瑜」論，自封「港姐冠軍」，結果辣慶陳靜（DaDa）和趙碩之！

明日是書展最後一天，眾o靚模為求榮登新一屆「寫真女王」，各出奇謀谷寫真，戰況激烈！Jeana與Hidy前晚作最後一擊，在尖沙咀舉行「胸戰比堅尼派對」，二人身穿比堅尼Top襯熱褲，狂騷事業線，還自稱寫真銷量第一，要開香檳慶祝，High爆互淋，Hidy把香檳淋在Jeana胸口，令現場升溫！淋完一輪後，她們轉戰夜店化身索爆DJ打碟，Hidy興奮到露出疑似肉色Bra邊。對於死敵許穎（Phoebe）自爆打碟時遭非禮，Jeana寸爆：「我觀察過佢嘅宣傳方法，正正做到佢想要嘅效果，『恭喜』佢！（Phoebe係咪講大話？）佢需要呢啲嘢，宣傳同嗰樣嘢（暗指非禮）係直接關係。」

玩嘢送方舟

對於言論四處辣火頭，被指「犯模憎」，令其他o靚模處於受害狀態，Jeana自辯：「我有高人指點，當自己處於低位，就要用呢個姿態博上位，但我唔需要做呢個位，係Loser先做呢個位！」對於樹敵太多，她口出狂言：「之前我想參加港姐，但畀我發現贏咗嗰個要忙做封面訪問，落選17位做乜呢？原來係約埋一齊食飯！我要造隻挪亞方舟，送晒佢哋（其他o靚模）走，唔使預我，因為我忙影相同封面。」談到早前在遊戲節目中疑似露點，她死撐已用乳貼。另外，Jeana在微博吐心聲：「我捱得住多深的詆毀，就經得住多大的讚美……我從來就不是為了別人而活，萬箭穿心，習慣就好！」

唔當係勁敵

至於染了橙髮的趙碩之昨日穿上吊帶低胸背心，狂騷四吋事業線搞寫真簽名會，老闆林建名及數十粉絲撐場。對於Jeana自比港姐冠軍，碩之反擊：「要問問無綫佢夠唔夠資格！（口出狂言同自大？）都係呀！我唔想刻意提呢個人，佢都口如其名。（Jeana直譯諧音？）唔使講到咁白！佢已經達到目的，咁多宣傳活動，一人加一句已經幫咗佢。（老闆心痛你？）林先生唔知佢係邊個！有攻擊性唔代表有威脅性。（Jeana係對手？）唔會係囉！我嘅對手係三年前嘅自己。（當Jeana係敵人定路人？）路人啦！」

此外，與碩之連成一黨的DaDa，昨日踩入旺角舉行簽名會，吸引數十人排隊，有六位保安護駕。談到Jeana的「港姐論」，她冷言相向：「又係佢？佢個人比較出位，佢嘅說話睇到厭、聽到厭，對佢冇乜意見。（怕咗佢唔加入罵戰？）唔係！只係覺得厭，唔鍾意同人嗌交，太肉酸，o靚模太性感，形象已經畀人唔健康感覺，再爆舌戰只會更加唔健康。」